Un scrittu di Antone Casanova

Bastia, sottu à l’acqua, nimu ind’è e strette fora di una donna, aspettendu un sciuglimentu inevitevule. Frizzinò è riculò a cullana di a vesta d’omu chì, in cuntrastu, dava à a so parsona un’apparenza di fragilità.

À l’improntu, sapia ch’ella averia in pettu à ella, una parsona assai intellingente è perspicace. Era esattamente ciò ch’avia dettu Francescu per discrive à so prossima sibula ; chì durente à so infiltrazione avia scupertu chì issu bersaghju avia un difettu : e donne … Era per què, chì Nina Verduroni duvia compie issa missione.

Tuttu avia principiatu cumu privistu : era entratu ind’u caffè à l’ora detta. U ricuniscì subbitu è sì messe à postu à cantu in fine d’ingaggià a cunversazione. Sicura ch’ella era, ch’ellu viderebbe i so ochji verdi è i so belli capelli rossi. Ma fù ella à ritruvà si cumossa da a voce dolce è u sguardu turchinu di iss’omu. Quand’ella fù invitata à ballà era dighjà inamurata.
À issu mumentu custì, per a prima volta di u so stranu mistieru, ùn era più sicura di nunda.
Passonu cusì tutt’a notte à ballà è ogni volta ch’elli vultavanu à tavulinu pensava à a pilula di velenu ch’ella duvia mette ind’u so bichjeru.

Quandu l’omu prupunì di piglià un ultimu bichjeru in casa ind’è ellu, Nina accettò. Cusì puderebbe compie a so missione senza nisun testimone.
Una volta ind’è u palazzu, si sò messi nantu à u futtogliu per piglià quellu benedettu “ultimu bichjeru”. Ma, cù a musica, quelli belli occhi turchini, è u sciampagnu, Nina s’hè definitivamente scurdatu di a so missione, chì era di tumbà iss’omu.

Si sarianu addrumintati cum’è dui amanti ordinarii sì a suneria di u telefunu ùn l’avissi dirangiati.
Spiccò u telefunu è a cunversazione fù assai corta. È disse à Nina :

- Nina… Mi dispiace… Mi ci vole à andamine…

Un’ultima prova di mette a pillula… Nant’à u parastaghju l’omu pigliò un libru di Stendhal per dà lu à Nina. Prima di dà lu, avia scrittu trè parolle nant’à a prima pagina : u so nome “Felice” è u so numeru di telefunu. Nina aprì u libru è cascò nant’à una corta bibliografia. E lacrime à l’ochji, Nina messe u libru in a stacca di a so vesta è sì n’andò. À u mumentu di sarrà a porta u telefunu si messe torna à sunà …

- Allo... Felice? Ghjè Marcellu . Sò ore sane chì provu à chjamà ti,
- Mi pari bellu annerbatu? Chì si passa?
- Iè, ti cuncerna, à nant’à cosa travagli?
- I laburatorii clandestini
- Dì mi… cunnosci à Maria Verduroni?
- Innò, ùn aghju mai intesu stu nome. Qual’hè?
- Una prufeziunale da tumbà.
- Si hè truvatu u so cadaveru sta matina in Vechju Portu è ùn era tantu bellaghju...
- Ma chì rapportu cun mè ?
- Aspetta a seguita ! À u scagnu, a chjamavamu l’esecutrice. Sapiamu ch’ella travagliava per u scruccone di Fanfan u longu. Ma, ùn ci l’aviamu mai fatta à chjappà la. Avà, poi fà a lea trà Fanfan è i laburatorii clandestini.
- Ti ne vulia parlà! Si hè vistu Fanfan in discussione cù u farmacista Hubbert.
- È quessa! Quand’u traficante scontra un farmacista, chi si ponu cuntà ? Storie di droga!
- Mi pari bellu à u currente !
- Sò pulizzeru quantunque ! I mo culleghi sò à nantu dapoi mese è mesi. À l’ora d’avà, tutta l’urganisazione hè pronta à cascà. Ancu quelli chì si cridianu intucchevule !
- Preferiscu ch’è tù ti ne stessi tranquillu in casa toia, à porta chjosa…
- Chì ti piglia ? Ghjè per via di a to esecutrice ? Ma ti dicu chì ùn la cunnoscu.
- Aghju assai raggione di pensà u cuntrariu ! Sta donna avia un cuntrattu è stu cuntrattu eri tù … ! Ùn ci l’hà fatta è ghjè per què chì l’anu assassinata. Un fiascu, ind’è quessi i mistieri ùn si pardonna… È aghju a paura chì altri venissinu à compie sta missione.
- Và bè, t’aspettu.
- Dì mi appena, ti piacenu sempre l’autori cum’è Stendhal ? Perchè avia in i stacchi un libru ; ùn avia altru nunda, è ùn si ne sò micca accortu ch’ellu ci era un libru in a stacca di a fodara.
- Nina ?
- Hà, vedi chì a cunnosci ! Nina era u so segondu nome. Maria Nina Verduroni era assassina prufessiunale. È a so arma prediletta era u velenu ! Dapoi quandu hà cunnuscivi?
- L’aghju scuntrata erisera è avemu passatu a serata inseme.
- È a notte?
- A notte dinù
- S’e ùn mi sbagliu, ti pudia invelenà parechje volte ?
- Hè vera ! È perchè ùn l’hà micca fatta?
- Pensu chì i to occhji di mare turchinu ci sò per qualcosa s’è ùn sì micca mortu !

U ricordu di u sguardu verdulinu li vense in mente.

- Hà, torna due parolle : nantu à a prima pagina c’era scrittu : “Addiu… Nina” è sottu u to numeru di telefunu è u tò nome… Sapia cosa l’aspettava…

Felice ascultò a listessa musica chè a vigilia.
Mezora dopu, tutta a banda era chjappa da a pulizza. Una pesca maiò ! Unu di i più grandi scandali ! Omi di rinomina è grande banditisimu !
Felice si stracquò annantu u canappè è pensò à e parolle di Marcellu: « Era quantunque una criminale ».