UNA PUETICA DI L'INULTIMATU

Ùn vene faciule à principià - masimu s’ellu si tratta di dà una risposta - megliu forse à chjappà u discorsu quand’ellu si hè digià fattu strada, da ch’ellu ci ingutuppi. Averia pussutu ripiglià sta infrasata di Claudio Magris : u primu affare ch’aghju scrittu era propriu stu puntu interrugativu chì, si strascina tuttu appressu. Sapè di u perchè di a scrittura, di u perchè di a lingua aduprata, in fatta fine, si puderianu schisà e dumande, da lascià l’evidenza andà cù i so pedi. Alluntanendu si ancu da a fiura, prudutta da un eccessu di lirisimu, chì dramatizeghja l’attu di u scrive. Da ùn impastughjà ci di più - è puru senza vulè lu nigà o rincalcà ind’un incuscente - scurdà quellu cuntestu di minurazione. È, invece di leghje i testi nostri, solu attraversu à u so raportu à a lingua, interrugà li cum’è no interrugheriamu a literatura in generale, imprimurendu si di u prugettu esteticu, di a dicitura o di e scelte furmale di ogni autore.

A scrittura, à parè meo, sprimeria a tensione trà l’esse in un tempu è a primura data à u travagliu nant’à e parolle. Trattendu si di u secondu aspettu, bisogna à arrimbà si à u pensamentu di Yves Bonnefoy - più chè teuria, si assumiglieria à attività di un artisgianu chì riflette nant’à a so pratica. A puesia cum’è intensificazione di u linguaghju, dendu di più prisenza à e cose o à e persone ch’ellu ammenta u puema è à e parolle chì e dicenu, spugliendu le da e raprisentazione chì appannanu u sguardu. Per ciò chì tocca à u secondu aspettu, ci saria da misfidà si di e dichjarazione di certi chì cercherianu à sottumette a scrittura à un impegnu suciale. È, avvicinendu si à ciò ch’ellu disse Mahmoud Darwich, liberà a puesia di ciò chì ùn hè pueticu, senza ch’ella ci sia rumpitura cù a realità, ma toglie li e funzione pulitiche, patriottiche è suciale chì omu li appiccica. Esse prisente in u so tempu, vene à dì esse cuntempuraneu, significheria mette a distanza - hè tandu ch’elle mutanu e pruspettive è ch’ellu ci hè di più piazza per a lucidità. Mi vene in mente un scrittu di u filosoffu Giorgio Agamben : quellu chì appartene propriu à u so tempu hè quellu di fatti chì si contra pocu cun ellu - definitu cum’è inattuale - è cusì puderia pruvà à cumprende lu.

In quantu à ciò ch’eo diceria di a scrittura in puesia, possu solu vede i lineamenti imprecisi di Penelope, u so puema riprincipiatu sempre è, trà mezu à u fà è u sfà di u so gestu, un picculu spaziu duve ci si stà bè, chì puderia chjamà si una puetica di l’inultimatu.