Campà si à fighjà u golfu di Portu è a riserva di Scandula à nordu sin’à u Capu Rossu à l’ueste, franchendu un chjassu propiu strasurdinariu

Si cunnosce e Calanche di Piana pè a strada, o puru à pede per quelli più arditi. Ma ci sò tanti chjassi daretu à issi scogli chì vi ammasgiuleghjanu. D’altronde andendu ver’di e Calanche à principiu è po à l’ultimu (in u sensu Piana - Portu) si trovanu i scrittoghji chì insegnanu da duv’elle partenu e spassighjate.Si ponu fà spiccate da una à l’altra o allora fà un giru cumplettu di 3 ore da unisce dui di i chjassi pruposti chì una parte passa nantu à a strada di E Calanche.

Cusì omu si pò gode u situ da un scogliu à l’altru è ingiru ci cantanu l’acelli è po u mare da quaiò. Ci hè una legenda in quantu à E Calanche è dice chì ciò chì hè «  ad avè le create saria statu u diavule da punisce una pasturella chì ùn a si vulia cunfà cun ellu. Cambiata in statula, sarà pè u sempre prigiunara d’issa cità fantastica pupulata da creature di petra. »

U puntu da duve si parte hè quand’ellu i esce da u paese di Piana. Si franca un punticellu cù à manu dritta una, una strada chì atteppa secca è và sinu à un terrenu di ballò duv’ellu si pò cansà a vittura.

Di prima si passa pè i punticelli in legnu è dopu si piglia à l’azardu pè una pinea maò. Ci tocca à sequità u chjassu di I Palani à mezu à unapochi di stradelli chì piglianu à girà tantu è più sottu à l’arburi. Dopu à una pendita ritta à bastanza sbocca in un castagnetu cù un panorama nantu à u golfu di Portu. Longu à u parcorsu si viaghja trà mezu à i scogli sculpiti. Unu trà i più emblematichi hè u Capu di Lione. Unu trà i più grossi duv’ella parte a passighjata.

Assai scogli t’anu i « tafoni » (tufoni in a petra per via di e variazione di temperature è umidità di l’aria, è dinù cagiunati cun l’erusione fatta da u ventu è u mare vicinu). Certi i chjamanu « Tafonu mortu » chì sò firmati è ùn cambiaranu più. Ma ci sò l’altri chì si patenu sempre l’erusione. A passighjata cuntinueghja falendu sinu à e ruine di Dispensa nantu à l’orlu di a naziunale. Omu si pò rinfriscà à a Funtana d’Oliva Bona.

Vultatu nantu à a strada si pò cuntinuà sinu à a famosa casetta in legnu « Les Roches Bleues » duv’ellu hè insignatu un altru chjassu.

Inizia cù una spezia di scalinata in petre giallogne chì atteppa sinu à una curnice da duve –ùn ci hè altru à dì- a vista hè un veru miraculu. Da custindi si pò vede l’infilarata sana di e Calanche di Piana, partendu à manca da u paese di Piana sin’à u golfu di Portu à manu dritta.

Issu chjassu longu ùn hè, è u vantaghju - in più di porghje vi una vista d’incantu- hè chì si volta da custindi nantu à u terrenu di ballò.