Qual’hè chì ùn averà mai intesu ammintà issu golfu è u so paisolu chì ùn ci si pò ghjunghje chè à pedi o in battellu? Eccu cum’ellu ci si và...

In i paesi ci si pò ghjunghje per istrada. Tutti ? Innò, un paisolu resiste è resiste sempre. Si tratta di Girulata duv’omu ci pò ghjunghje solu per mare o dopu à parechje ore di marchja. Situatu nant’à a costa occidentale di a Corsica prima di Portu s’omu vene da Calvi, ci si pò fà l’arretta vicinu vicinu à a famosa riserva di Scandula. S’è l’invernu in Girulata ci stanu solu ondeci persone, ci ne hè assai di più toccu a bella stagione per via di a ghjente chì ci scala in battellu, in vacanze o caminendu pè i chjassi.

Ci tocca à piantà à A Bocca à a Croce è piglià u chjassu chì fala à manu dritta. Gira è rigira è ci hè l’ombra à bastanza è ci sò belli punti di vista nantu à u mare è e rocche rosse. Dopu marchjatu un’ora si ghjunghje à u lidu bellissimu di Tuara pè un' arretta è un bagnu chì facenu prò. Sottu acqua hè un vede cun visere è tubà, ma u spettaculu ci hè dinù nantu à a rena, cun vitelli, vacche è purcelli! Sò i porchi à esse più burlasconi, si ciottanu in l’acqua è s’elli annasanu robba da manghjà, eccu li è insistenu! Attenti chì ne ponu esse ancu agressivi.

Dopu à issa arretta chì rinfresca si pò cuntinuà a passighjata. Si passa pè i lidi è custindi ci sò dui chjassi : o si passa pè a terra à l’indrentu, o si piglia à fiancu di a rocca : era quessu u chjassu di Guidu u pidone. Per ghjunghje in Girulata ùn si pudia passà chè di custì, è u pidone ancu ellu era ubligatu à piglià issu chjassu. Hè cusì chì Guidu, l’ultimu pidone li hà datu u so nome.

S’ellu si piglia u chjassu à l’internu, u slivellu hè più forte è u chjassu bellu spostu à sulia. Ma custì dinù, l’avvinta ne vale a pena à fà la, chì si pò vede u golfu di Girulata inghjò à l’appollu, à un’ora di marchja. In u paese ci sò caffè è risturanti è qualchì casa, ma sopra à tuttu u castellu è l’aghja chì supraneghjanu a marina è a calella.

Dopu à l’arretta, si pò vultà da l’altru chjassu longu à a rocca. Hè più cortu è più strettu ma passa sopra à u mare : scogli rossi appicciati, variazione turchine è mare distesu à l’infinitu.

Issa passighjata si merita ch’omu facci l’avvinta, a natura hè salvatica è prutetta è, à dì la franca, ci si stà abbagliulati !