Andate puru chì cullà po colla ! U minimu ch’ellu si possi dì nantu à l’Arca di Corti, o l’Arca di Scandulaghja hè chì issa cosa si deve merità.

Sò 1100 metri di slivellu è micca di menu nantu à un pocu di più di 4 chilometri. Bona, ci vole à vede ci un vantaghju, cum’è u cavallu chì volta à a stalla : u ritornu si face più in furia chè l’andata !

Ci vole à sapè la, anu da strazià i musculi di e cosce è di e schinche vostre. Hè chì l’Arca ci tocca à merità si la, è ùn andate à crede chì, trattendu si di un parcorsu di trail rinumatu, hà da esse variu u chjassu è si hà da spianà dopu à a prima cullata à piccu. Innò, colla, colla è po colla sempre sempre!

Ma finalamente quand’ellu si crede ch’omu ùn finiscerà mai di cullà, hè custì ch’ella vene a ricumpensa, l’Arca spicca nantu à u paisaghju. Di prima hè discreta è po dopu ùn si pò più mancà vistu a so taglia impressiunante.

Omu si dumanda cum’hè ch’una « struttura » simule si pò furmà di natura. U tempu di un’arretta pè una siesta meritata assai è d’un rompidighjunu sottu à u Rotondu chì accura è po si hà da pudè rifalà.

A falata si face in furia, più in furia, dura trè volte di menu chè u tempu di a cullata.