Vicinu à Prupià, issa piccula marina pare spiccata da u mondu è si assumiglia à qualchì ritiru calmu è serenu chì vale a pena di andà ci solu solu per quessa. Un picculu golfu chì porghje una piana marina cù a vista nantu à a torra in un’acqua turchinella chì hè una campa.

Issa passighjata hè da fà in famiglia. Tuttu hè accunciatu è pannelli spiicativi insegnanu à chì pedieghja custì parechji punti di u parcorsu è dinù qualchì fattu storicu in quantu à issu situ.

Hè cusì ch’ellu si ampara chì quand’ellu ùn ci eranu i castagni, si adupravanu i ghjinepari da fà burdinali è cantelli. Si spieca dinù cum’ellu era fattu u carbone cù i catasti in legne è in pienu mezu un tufone.

U chjassu gira è rigira è omu si laca purtà da un pannellu à l’altru sin’à a porta magnifica in legnu di l’accinta di a torra. In giru à issa torra, ci hè un’accinta furtificata. Altra particularità a torra hè a più larga chì si hè fattu nantu à u liturale corsu è… di fatti, si strazieghja à fà la entre in ... l’ogettivu di u ritrattu !

Ma per disgrazia, costa caru à intrattene tuttu u situ è s’omu vole visità a torra ci tocca à aspettà a stagione turistica è cappià unepochi d’eurò.

È puru a passighjata cuntinueghja nantu à a penisula è face un giru cumplettu longu à u liturale. Cumu un pocu in tutti i lochi d’issa parte di a costa, i scogli l’anu zuccati i venti è i scrizzi di u marinu…