UN BUISSON DE PAROLES

Scontri di 01.11.2021

 

Isse ragiunate ch’elli si anu fattu inseme M.J Vinciguerra è F.S.Renucci in u primu semestru di u 2015 sò un ducumentu assai utile da cunnosce a Corsica di st’ultimu trenta anni, u so cuntestu suciale è puliticu, di forze a so identità a tenenu arritta ma ma ch’omu si ne scorda spessu spessu è chì a facenu ancu debbule quandu ùn ni ne scorda più.

U postfaziu d’issu « Buisson de paroles », redattu cun finezza, precisione è mudestia da P.S. Renucci, face vede tutte e tematiche è l’urientazione d’isse discussione è po ne insegna u chjassu sequitatu.. Insegna ancu u valore d’issi cuntenuti pè e leve nove di a Corsica d’oghje è incalca in modu assai ghjustu a variatezza è a divizia di l’opera culturale ch’ellu hà alzatu l’autore è po offerta da ch’è no ci pensessimu è riflettissimu nantu.

Issa testimunianza hà da marcà u so tempu è a memoria cullettiva di u nostru populu. Issu particulare vene ancu da a so forma è mette in lume quant’ellu hè uriginale issa persunalità di livellu altissimu. A so carriera, u so parcorsu biugraficu, prufessiunale è puliticu, i so viaghji pè u mondu sanu cumponenu un inseme diviziosu assai è cumplessu. Ci si scopre -è spessu cun lume altu- una individualità chì s’attira è si merita di esse fighjata cù ammirazione, ricunniscenza è ci sarà ancu voglia di assumiglià si à issa figura splendida.

Visionner la vidéo