Un picculu puntu di bilanciu dopu à un annu, oramai, d’azzione pedagogica in partenariatu trà u rughjone di U Viscuvatu è u prugettu SPASSIGHJATE IN CORSICA.

In Casinca issa azzione di travagliu è di baratti hè cuurdinata da Letizia BALDI, Direttrice di a Scola Primaria bislingua;

Ci sò assuciati unepochi persunali di l’Educazione Naziunale:

BALDI Laetitia Direttrice d’école Scola bislingua di U Viscuvatu paese.

THIERS.G. prufessore emeritu, incaricatu di missione “creatività” à l’UCPP.

Presidente di L’ASSOCIU CORSU DI L’IITM (Fundación Instituto Internacional del Teatro del Mediterráneo)

ANTONETTI Angelina Prufessora di lingua è cultura corsa, ESPE di Corsica.

E SPASSIGHJATE fatte in l’ambiente vicinu vicinu anu da permette à i sculari di a scola bislingua (da a materna sinu à u CM2) di Viscuvatu paese di vistigà u so patrimoniu lucale ( materiale, immateriale è naturale) , è po dopu dinù di creà raconti, legende è canzone in lingua corsa.

Hè capita ch’issa azzione vole fà di l’ambiente vicinu di l’allevu un puntellu pedagogicu ed educativu, arnese è attore d’insignamentu è amparera.

Vene à dì quant’ellu si intende, per mezu di a scola rurale, di animà issu ambiente territuriale (geugraficu, storicu, culturale è suciale) sinu à dà li a dimensione di un paese educativu, un ambiente chì ampara.

Issu prugettu adopra mezi varii assai, trà situazione pedagogiche è participative, cullaburazione parechje, andatura chì cerca a creatività è, bella sicura, mutivazione forte ver’ di a pratica in lingua corsa. U zitellu, si vole aiutà lu à parlà, sprime si davanti à l’altri di u gruppu, mette in opera ciò ch’ellu sà, sente è ampara è dinù sullicità lu ch’ellu possi mette in opera e so capacità di creà à parte si di u so imaginariu, individuale è cumunu. Hè capita chì u fine di stu prugettu vole esse cuntribuzione, un aiutu-trà l’altri- da custruisce a parte citadina è suciale di a so persunalità di citadinu di dumane

In issa azzione di E SPASSIGHJATE ci venenu assuciati parenti, partenarii istituziunali è suciali, ghjente di u circondu di a scola atte à participà da fà riesce l’azzione trà scola è ambiente: museu, associ culturali è persone “risolse” in u rughjone.

Si tratta dinù di familiarizà in l’amparera u manighjà di l’arnesi numerichi per l’infurmazione è a cumunicazione, a ricerca di i ducumenti è l’illustrazione di i testi creati, a lettura, a dicitura “teatrale”, u cantu è a mostra d’opere è ducumenti.

Iss’azzione và dinù cù un travagliu di ricerca cun l’associu di sestegnu di u CCU è u so situ www.interromania.com chì hà apertu un laburatoriu « I chjassi di e spassighjate in Corsica, u legendariu è u territoriu » .

A SQUATRA-I PARTENARII

A squatra insegnante (Mma. BALDI, Mma. BESIR-GARBUCCIA, Mma. RISTICONI, Mma ROSSINI)

THIERS.G, prufessore emeritu, incaricati di missione “creatività” à l’UCPP

Mma.ANTONETTI (ESPE di Corsica)

• A municipalità di U Viscuvatu,
• L’ispezzione di circuscrizzione Fulelli-Piaghja Urientale
• INTERROMANIA, ASSOCIU DI SUSTEGNU DI U CCU, L’ASSOCIU CORSU DI L’IITM (Fundación Institut Internacional del Teatro del Mediterráneo)
• Serviziu CCU (Centru Culturale Universitariu), U Teatrinu, Patrizia GATTACCECA,
• Mr.COMPARETTI (rispunsevule di u museu « A memoria » in Viscuvatu (paese), Mr MICAELLI (storicu), Mr RAFFALLI,
• Mr. ORLANDUCCI (prupietariu di u mulinu di Viscuvatu, scrittore è circatore) , Mr.GIANSILY (storicu)
• Parenti d’allevi : Mma MARIONI, Mme MICHELI, Mr CANTELLI (parente è pufessore LCC).