STANDARDIZAZIONE è LITERATURA

Scontri di 29.05.2021

In u seguitu di u scambiu ch’emu avutu l’ultima volta incù vo, Alanu di Meglio è Petru Santu Menozzi, vulariu cuntinuà appena nant’à a noscia riflissioni inghjiru à a literatura corsa.

 

1) Emu ammintatu in furia l’ultima volta, a literatura 2.0 è tandu mi piaciaria à vultà un pocu incù vo nant’à stu cuncettu.

Chì sariani i criterii di a literatura 2.0 ? Ni parlemu aspessu, ma ùn ci hè micca veramenti una difinizioni, criterii bè stabiliti. T’avemu asempii di scrittori chì facini parti di sta literatura 2.0, i classifichemu mittenduli in sta catiguria,  ma ùn ci hè micca à veru una tiurisazioni di stu cuncettu.

 

2) Chì sariani i sfidi di sta nova literatura corsa ? Pinseti chì a sfida maiò si piazza à niveddu di un scambiu di i timatichi trattati o ci hè altr’affari à fà ?

 

3) Longu à i vosci annati di scrittura, eti vistu un scambiu in i vosci scelti literarii (ghjenaru literariu, timatichi trattati...) ?

 

4) Dimu aspessu ch’edda ci voli ad avè una standardisazioni di a literatura corsa cù un’accademia, una critica literaria. Sta critica literaria ghjè qualcosa chì manca à veru ind’è no.  Ma pari difficiuli di parlà di una standardisazioni di a literatura in una lingua chì edda ùn hè micca standardizata nò ?

 

5) Vocu aldilà di a literatura è mi piazzu di manera più ghjinirali. Pinseti chì una standardisazioni di a lingua saria una manera di sparghja di dipiù a lingua corsa ?

Saria cuntrariu à u nosciu principiu di pulinumia ma ghjè quantunqua una dumanda ch’è ci pudemu pona.

 

6) A literatura corsa hè una literatura ricenti, tandu podarsi ch'in fini di conti ghjè nurmali ch'eddu ci fussi bisognu d'un certu tempu da mettala in sesta ? Parechji dicennii o ancu seculi. Chì ni pinseti ?

 

7) Pensu chì u fattu chì a lingua corsa ùn sichi più veiculari ùn hè micca un inciampu pà a pruduzzioni literaria corsa. Pò essa cunsideratu com'è un scambiu di a funzioni di a lingua drentu a sucità. U corsu, prima, lingua di l'uralità duvintarà lingua di u scrittu risirvatu à una piccula parti di a populazioni ? Hà da duvintà a literatura corsa una literatura di sapienti, d'eruditu ?

 

8) S'è no partimu da l'adea chè à un mumentu datu, a lingua scritta supranarà a lingua parlata, veni à dì chì a pruduzzioni literaria corsa asistarà ma ùn camparà micca, pà colpa di un litturatu troppu debuli, tandu, vecu com'è unica soluzioni a traduzzioni, l'idizioni bislingui. D'apressu à vo, ghjè qualcosa chì apparisci com'è una soluzioni à stu prublema ? Una manera di fà campà a noscia literatura ma senza a lingua.

 

 

 

Visionner la vidéo