“IN LINGUA CORSA”

SI N’HÈ ANDATU AMATU PIETRI

         Amatu PIETRI hè un omu chì hà fattu tantu pè a Corsica dendu li i strumenti di barattu è riflessione nantu à l’attualità di u nostru paese. L’hà fatta  senza chjode lu nantu à sè stessu, nè in un discorsu o attitudine di ricusu di fronte à l’ALTRU. Hè statu propiu u cuntrariu...

Speremu ch’è no cuntinueremu à sfruttà unepoche di e nuvità ch’ellu hà portu à a Corsica senza cappià la mai mai. Hà fattu propiu u cuntrariu! Hà arricatu ind’è noi nuvità impurtantissime in e tecniche di a cumunicazione. Cusì a Corsica hà pussutu entre in i linguaghji di a mudernità, senza lacà da cantu cultura è lingua nustrale.

Hè statu ancu à fà vede cumu sbrembà e chjusure di a diglussia, subitu in u 1975. Pensemu in particulare à u giurnale chì aprì a rubrica « IN LINGUA CORSA » cun Rinatu COTI è Francescu MATTEI. Duie voce è scritture nustrale atte à dà fiatu à a spressione pumuntinca è cismuntinca senza cunflitti “dialettali”. A primura  di una lingua corsa pulinomica, atta à caccià u corsu da a diglussia, è dinù di fà lu spannà in parechji atti di creazione è di spressione oghjinca. Eccu a so idea spressa in issu numeru 58 di KYRN. Dice : “L'amore ritrovu di i Corsi pè a so lingua, a so vuluntà accertata sempre di più non solu di “salvà la”, ma ancu d’illustrà la, anu da truvà quindi un puntellu novu”.

Dunque pensemu à iss’opera è à issa persona  chì ci hà datu tantu, è senza mancà mai mai... d’amicizia è di rispettu.

Intantu, rilighjimu l’annunziu di l’apertura di “IN LINGUA CORSA” duv’elli si sprimeranu tante voce di U Riacquistu è e leve nove.