Vincenzu Mariotti : - L'avemu corsa brutta, vai puru !
Ziu Simone : - In quaranta anni focu simile, ùn si ne hè vistu in paese...
Lucia : - Hà picciatu sottu à l'ultime case è in una meza ora avia francatu u paese in un lampu è attippava versu à a sarra...
Petru Maria : - Ancu di grazia ch'ellu hè passatu in furia ! Ùn hà fattu chè liccà e case...
Lucia : - Quantunque, a paura l'avemu avuta à veru !
Petru Maria : - U ventacciu ! hè u ventacciu ! Mette à suffià è quale u para, tandu !
Ziu Simone : - Simu sempre à listesse quistione. Stemu in paese, accampati da a machja...
Vincenzu Mariotti : - Demu capu à l'affare quand'ellu scoppia u focu, è dopu, ùn sapemu più nunda.
Ziu Simone : - Chì voli fà ? Ùn hè più tempu di ragiunà ma di agisce.
Vincenzu Mariotti : - È di punisce. A ghjente ne anu una techja di trimà tutte l'estate.
Francesca : - Ùn hè solu di piglià i picciafocu. Hè una azzione longa. Dumanda tempu, mezi è risolse umane.
Ghjuvan Paulu : - À` pocu à pocu, si capisce megliu u dannu di i fochi... In e scole i maestri facenu l'infurmazione...
Lucia : - Ghjunghjerà un’epica chì saranu più scarsi. Saranu accidenti è basta.
Ghjuvan Paulu : - Và tuttu inseme, in i lochi puliti, focu ùn ne parte.
Ziu Simone : - Tempi fà i paesi eranu pieni à ghjente, è i fochi ci eranu...
Ghjuvan Paulu : - Iè, ma ùn avia micca listessu significatu. Eranu fochi chì scappavanu. " Accidenti " hà dettu Lucia...
Lucia : - U focu ùn hè micca una fatalità. Hè a cunsequenza di una situazione ecunomica.
Ghjuvanni : - In Sardegna, ind'è l'isule mediterranee, u focu hè una preucupazione...
Ghjuvan Paulu : - Sò tutti lochi poveri, sottumessi à a primura di u prufittu è di u denaru faciule da buscà...
Ghjuvanni : - Senza strazià tantu.
Lucia : - U focu hè un prublema ma si pò parà.