Scontru Culturale in caffè cù Ghjacumu Thiers

Ripigliemu a stagione 
Avendu per ambizione
Riceve Corsi famosi
Altruisti è generosi 
Fenduli un cumplimentu
À l'amicizia fermentu

Da lu Centru à l'Amirale
Emu cambiatu lucale
U secondu hè sferente
Ma quant'è l'altru accogliente
Tamantu è decoratu
Languisce d'esse culmatu 

U primu di l'invitati
Unu di i più stimati
À u corsu hà portatu
Un amor'sprupuzitatu
Cunsacrendu a so vita
Pè fà li strada fiurita

Quandu i scontri sò nati 
Ghjacumu Thiers l'hà ornati
In cumpare prestigiosu
Benignu, affettuosu
Ch'ellu sia ringraziatu
D'avè cun core accettatu

Ci seguita vulenteri
È ùn li demu penseri
Chì a nostra a passione
C'insegna a direzzione
Di rispettu è tulleranza
È di grande fratellanza

Cū Bastia duv'ellu hè natu
Si cumporta in namuratu
Ne face un persunaghju
À quale si rende omaghju
Ind'i so libri stampata
À l'eternu preservata. 

Cathy Campana 30/9/2023