Campemu in un'epica moderna...

            L' ipermarcati sò diventati i lochi i più frequentati in Corsica dipoi parechji anni. A pussibilità di fà tutte e so spese in un solu locu attira affullanza.

Sicura chì ci sò quelli chì si ne lavanu a bocca di i cunsommatori andendu ci, invece di cuntentà si di spende in li picculi cumerci, ùn fusse chè par permette li di campà. Quelli chì pienghjenu per i cumerci chjuchi, forse volenu coglie l'erba à a lofia ?  Acqua in bocca !  Iè ma, si nimu ùn compra in i grandi magazini, quale hè ch'hà da fà campà l'impiegati corsi di  l'insegne naziunale ? S'è vo dite à certi què vi pigliate l'osse in gola. Ùn ci hè bisognu di culpabilisà a ghjente, neh ? È pò u Signore ùn paca micca tutti i sabbatu sera, un ghjornu i grandi sparisceranu è ùn fermeranu chè i cumercioli.

Una rimarca : Cumu serà chì i ricchi ùn si vedenu mai in i grandi magazini ? Ci manderanu à qualchissia? Ci sò ancu i particulari chì facenu vene a robba da cuntinente, ma ùn ci vole à stonà si di nunda. Ogni ghjorni ci simu avvezzi à pontà i carretti, cum'è issi tintacci di e mine di u carbone. Certi quand'elli anu i carri in manu ghjunghjenu à a soia.

Ci passanu l'ore è l'ore à girandulà in u magazinu è à empie li à tappu. À chì compra per un mese, à chì compra pà a ghjurnata, ognunu balla à u so sensu.

I clienti spendenu ma sò ancu boni à fà i rimproveri, ci n'hè pà tutti è pò ne resta.

 Quante cose ch'ùn vanu, u costu d'una mercia chì cambia da u parastaghju à a cascia, i prudutti di cattiva qualità, u cambiamentu di i prezzi chì crescenu da un ghjornu à l'altru ecc … I cattivi mendi ghjunti in Corsica da pocu si distinguenu dinò in sti lochi. Hè finitu u tempu chì Marta filava ? Cum'è da partuttu ci vole ad avè u rispettu di l'altru. Ùn si deve mai cercà rogna à grattà ma certi facenu perde a pazienza ancu à i santi. I bancaghji stretti stretti ùn si piglianu micca in vitezza (o tant'altre maneraccie d'altrò) incù a scusa chì ci hè una tavulinata à nutrisce à meziornu.

In l'ipermercati ci vole à esse pazienti, andà à un ritimu tranquillu, senza mai annerbarsi. È pò, chì piacè di podè fassi una chjachjerata incù un amicacciu chì ponta anch'ellu u so carrettu ! Rimercate, u carru ghjova pà appoghjà si nantu, è riposà a so anima fiacca di tantu travagliu.U travagliu pò ci hè ! Ùn credite micca ch'ella si lampi à di per ella a robba in i "caddies."Prima, ci vole à trovà la. Ohimé, quant'à mè paganu una persona nunda chè per spiazzà a marcanzia da una parte è da l'altra di u magazinu, ogni ghjornu. À ciò ch'ella ghjova, ùn si sà ma ci serà sicuramente una malizia sottu, andate ! Dopu ci vole à ùn sbagliassi, ùn piglià micca tale scatula di pisi invece di tale altra.

I clienti d'ipermarcatu anu una formazione fine d'acquistadori, ancu s'ellu ùn hè stata amparata in scola, u bisognu rende l'omu ingeniosu. 

In listessu tempu u cervellu di quellu ch'accatta deve calculà, cum'è un espertu cuntabile d'ùn eccede a somma ch'ellu tene in banca. 

Ùn ci vole micca à fà u passu più grande chè l'inforcatoghja

U problema hè chì e cataste di tutta sta robba sò piazzate di manera à davvi ne a voglia.

Basta à mette la in u carrettu è v'avite da campà, à vi mandiate capu nanzu.

Pensu chì certi supermercati meriterianu ch'o li portimu una lagnanza, per incitazione à u cunsumu è i risichi pà a nostra salute. Quale hè ch'hè capace di comprà ghjustu u necessariu ? Nimu ! 

Finita a spesa, vene u momentu temu da tutti, a coda. Eiu ci tengu quant'è u cane à a cipolla. U tempu ch'ellu si perde à stà impalaficcati, ci hè da rode l'agli ! Ancu st'attu dumanda d'esse studiatu bè. Si pò sceglie una cascia perchì a giovanotta hè belluccia, calculà per provà d'ùn chjappà e varice tant'hè longa l'attesa, o mille altre ragiò.Ùn si và mai versu una cascia à l'azardu. Cum'è in una strategia pà direge un'armata in guerra, quellu chì si sbaglia a paca. Ci pò passà un tempu scemu. Ancu assai chì e lingue sò arrodate. Pezzi di tone è di saetta contru à u patrone ch'ùn mette abbastanza casciere, a casciera troppu loscia, a persona anziana chì piglia i so commudi eccetera eccetera....

Pensate chì, una volta pagatu, e vostre obligazione s'arreghjenu ? andate torna ! Vi ferma à trovà a vittura in u parcheghju, induve serà ?   À mette issa tamanta spesa, asquistata cum'è s'omu eramu in tempu di restrizzione, ind'u cascione è, ricumincià listessa cumedia ghjuntu in casa. Dopu ùn vi tocca più chè ad arrangià tuttu in i placcà è riposavi una cria di tutte ste faccende.Finalmente i nostri anziani ùn avianu micca u cunfortu d'oghje, ma mi dumandu si a nostra vita ùn hè micca più straziata ? 

Aiò vi lasciu, aghju da andà à fà e cumissione, in Toga.

Cathy Campana, lugliu 2019