U PRETI È A SO AMICA

Bianca, di Palleca, è Silvestru, un pritanchjinu di Ciamanacci, s'amavani, ma benintesu ùn si pudiani marità.

Hè vera chì un preti innamuratu si ni vedi pocu, ma ci voli à sapè ch'eddi s'amavani dighjà quand'edd'erani inseme à a scola.

Silvestru s’era fattu preti quand’edd’hà sappiutu chì u so babbu u vulia marità incù un’altra donna chè Bianca.

Ùn si pudiani veda tantu suventi chì Bartoru, frateddu di Bianca, l'avaria tombi s’eddu i vidia inseme.

Una sera, s'erani ritrovi in a cappedda di San Ghjuvanni.

Dopu avè accesu i candeli, si tiniani strinti incù tinnarezza quandu i candeli si spinghjini di colpu, è un passu si faci senta !

Tacchi tacchi tacchi... Bianca hà ricunnisciutu u passu di u so frateddu chi era sciancu.

È po pan pan !, dui colpi di pistola è Bianca casca morta in bracciu di Silvestru.

U preti hà capitu chì a prossima cartuccia saria pà eddu.

Allora si lampa fora è scappa currendu in a machja. U passu hè daret'à eddu è à la fini si trova davant'à a porta di u campu santu.

Era chjusa, è tandu si vedi persu.

Ma un cavaddu hè quì, come pà salvà lu ! Silvestru s'achjappa è fughji. Bartolu era in collara nera !

« Dariu ancu a me anima à u diavuli pà pudè lu tumbà ! »

Tandu si prisenta Satanassu, si sò missi d’accunsentu è partini à cavaddu, Bartolu u frateddu in groppa, à daretu à u preti.

Patapà patapà patapà...

Silvestru avia un cavaddu incantatu è in pochi mumenti si trova da quandi à una muntagna.

U cavaddu di Satanassu fila anch'eddu come u ventu, !

Patapà patapà patapà... Dopu avè fattu u tornu di tutt'a vaddi di u Taravu, sò vultati à a cappedda di San Ghjuvanni.

Satanassu si sbarca è dici à Bartolu:

« Tè ! Hè u toiu ! Fà ni ciò ch'è tù voli.

- Bruttu pritacciu ! Parchì avendu amata a me suredda, m'hà ubligatu à tumbà la?

-Dumandu pardonu. Eiu l'amavu ! Dumandu piatà !

- Ùn ci hè piatà pà l'ingannatori ! »

Eccu ch'eddu piglia u preti pà i cappedi, u trascina in terra è Silvestru à la fini casca mortu accant'u cadavaru di Bianca. Si pesa allora un ventu scatinatu, accenditi è toni, è po Satanassu, aiutatu da trè altri dannati di l'infernu, si portanu i dui amanti è ancu Bartolu, u so assassinu.