Cala de Sant Vicent (Eivissa)
![](https://interromania.com/sites/default/files/styles/image_548xx/public/04_cala_sant_vicent.jpg?itok=Rff0eYiX)
U turisimu scalò à e Baleare, principalmente in Maiorca à l’iniziu di u XX seculu. In u 1905 si creò in l’isula più grande a Liga di u Turisimu, entità privata cun scopu di fà cunnosce l’isula. È puru issa attività pigliò cima solu in l’anni 1960. Tandu principia l’urbanizazione sfrenata di u liturale in Maiorca è in Ibiza, à fine di custruisce alloghji, alberghi, appartamenti per turisti ghjunti da l’Europa sana è di l’America di u nordu. Trà 1960 è 1990 a custruzzione hè crisciuta in modu incridibule è u numeru di abitanti hè statu duppiatu, cù immigrazione di pupulazione di u Sud di a penisula iberica. Oghje, e Baleare, chì eranu cunnisciute cum’è terra povera è di emigrazione, anu un livellu di vita altissimu ma a contraparte hè chì anu distruttu in bella parte u so patrimoniu naturale. U fenomenu hè cunnisciutu à l’internaziunale cù u nome “balearizazione”. Minorca è Furmentera qualcosa anu salvu è prutettu, ma i speculatori ci facenu nantu una pressione chì mancu à pensà la...
Si vede a cala de Sant Vicent, à u nordeste di Ibiza, cù una muraglia di hôtels in giru à u mare, cum’ellu hè di regula in a maiò parte di e piaghje di Maiorca è di Ibiza. L’acqua, hè certa, hè limpida è chjara è invita à ciuttà si, ciò ch’elli facenu custì tutti l’anni d’estate miglioni di persone.