St’edifiziu hè u più impurtante di u Mediterraneu è unu trà i munimenti gotichi più maiò in u mondu. Occupa un spaziu di più di 7000 m2, largu di 121 m è longu di 55 m. Divisa in trè nave, a centrale hè alta 44 m, mentre chì e laterale facenu 29 m. Cuntene un vulume di 160000 m3. In u 1903, dirette da l’architettu Antoni Gaudí sò state fatte e mudifiche chì anu spiazzatu u coru da u centru à a cappella Reale, daretu à l’altare maiò. A Seu, cum’elli dicenu a ghjente hè stata principiata subitu dopu a Cunquista catalana, in u 1230, duv’ella ci era stata a muschea principale di l’Arabi, è ùn hè stata finita chè à u XVI, à tal puntu chì ci sò sempre i detagli ancu à compie. U campanile, custruitu trà u XIV è u XV hè assai largu è altu 48 m. In a Seu ci sò i sepolcri di dui di i rè di Mallorca: Jaume II è u so figliulinu Jaume III.