Versione :
Corsu

L'ATTORE SECONDU M.G.NICOLI

M.G.NICOLI: I RAMENTI DI L'ATTRICE

ADDISPERU? INNÒ... RADICALITÀ!

    M.G.Nicoli incentra a so parolla nantu à struttura di u travagliu di Tognotti (allevu di Jerzy Grotowski) di pettu à l’ATTORE. Intende u travagliu di a persona curpurale. Un travagliu penosu assai, un straziu fisicu à le volte. Una cerca attente à scopre in a persona u gestu sputicu, ligatu à tempu cù a memoria cullettiva è l’imaginariu individuale. Issu teatru vole esse un attu puliticu ma teatrale, vene à dì chì ùn si vole lacà incappià pè una causa o l’altra. L’idea ch’ellu purtava Tognotti era chì per via di issu travagliu curpurale, per via d’issu gestu teatrale, per mezu à volte ancu di parolle o di soni è spressione à pezzi, a cumunutà di u populu corsu pudia ritruvà una cumunione, un slanciu attu à fundà un’altra a volta u cumunu. In qualchì modu un rituale fundatore, magaru rifundatore… Di sicuru, dice M.G.Nicoli hè una cosa chì si pò discute è cuntrastà, ma u fattu si stà chì pè u gruppu, per mezu d’issu raportu à u tempu è à u spaziu ci passava una forza indicibile, ma chì ùn si pudia nigà, ch’elli sintianu è risintianu senza dubitu tutti quanti l'elementi di Teatru Paisanu. À tal puntu chì in issu modu, u publicu pretesu « testimone » in fatti era fattu ancu ellu ATTORE.

    Una manera furtissima di pensà a funzione dramatica è chì scatavultava l’esse, è chì dumandava propiu assai à ogni attore indiatu in issu travagliu. Ùn era mancu stampa interpretazione di qualcosa esternu, qualcosa fora di sè, ma un’operazione forte di spuglià si l’esse è mette si à nudu nudu.
     Interrugata s’è issa estetica avia cunnisciutu un’evuluzione, M.G.Nicoli risponde… micca tantu. U raportu cù a parolla sì, squassendu a nuzione di « testu » è à l’ultimu si ne ghjunghje à u ballu. Ramenta l'attrice ch’ella avia scrittu ind’è a rivista Cuntrasti chì issu modu di lacà corre a parolla era un segnu di girà u spinu à a speranza… Addisperu?
     Ma vultendu ci nantu oghje, li si pare piuttostu ch’ellu si trattava di una forma di radicalità, di radicalizazione di a so estetica…