SPASSIGHJATE LITERARIE: “L’ingannatori ingannatu”

II-VII                                             L’INGANNATORI INGANNATU

 

Tignuseddu era riccu ! U so babbu, avanti di mora, l’avia lacatu una furtuna, casi, chjosi in quantità. C’era ancu una scatula piena di pezzi d’oru.

 

Pudia campà senza travaglià ma com’edd’ùn era micca tranchjulu, ma travagliadori, si piantava i so cinquicentu mizini di granu tutti l’anni.

 Semu d’aostu, era compia a biada, è Tignuseddu  era cuntenti d’empia u so sulaghjolu di granu..

 

 Ѐ cusì, facia grandi vita è ghjittava i soldi pà u balconu.

 

U Preti, chì  avia vistu a so manera di campà, comu era montasega, baciardu è ancu troppu malignu,  un ghjornu si cansa indè Tignuseddu :

-« Saluta o Cumpà, semu carchi di granu, chì vecu u sulaghjolu pienu ?  Ma comu faci pà lacà à babbitu in purgatoriu allora ch’è tù sè cusi riccu !

     Paga è fà lu cuddà in paradisu ! »

Chì possu fà eiu, omu murtali è senza fedi, pà fà ciò ch’è tù dici ? »

-« Divarii sapè chì incù i soldi , si pò ancu fà apra i porti di u celi !

     Tè, dammi  deci mizini di granu, è in dui ghjorni, babbitu hè in paradisu. »

-« Ti ni daraghju ancu dodici, pà modu dì  una soma di sameri,  ma vogliu veda à babbu cuddà in celi. »

 

-« Allora veni dumani in sacristia  incù  u to granu è vidarè ch’ùn t’aghju micca sbagliatu. »

 

U lindumani Tignuseddu appronta a soma è metti nant’à ogni parti di l’imbastiu sei mizini di granu, È piglia a strada di a cappedda.

 

O Tignusè, vedu ch’è tù sè di parola. Babbitu, quassù, sarà cuntenti. Tè, scarca u sameri è  poni quì i to sacchi pieni .

-“ Vidaremu dopu. Prima vogliu chì i me ochji vedini cuddà u me babbu in celi, comu l’aveti prumissu. »

-« Faremu cusì. Laca mi piglià u me libru santu . Ci voli ch’è tù metti u to pedi nant’à u meiu è incalcà quandu lighjaraghju. »

 

U preti apri u libru, stalbachjeghja paroli latini, canta è po si taci, è po canta torna...

Dopu pesa l’ochji è dici :

Hè ghjunta a risposta di u celi. Babbitu veni d’escia di u purgatoriu è dui anghjuli l’ani presu sottu tiddu è s’approntani à cuddà. . I vedi avà ?

-« Ùn vecu nudda eiu. «

-« Incalca dinò nant’à u me pedi »

-« Avà u vecu. O com’edd’hà cambiatu u me babbu ! «

-« Aspetta un pocu, ci voli dinò à leghja. Ma fà pianu chì mi sfracechi u pedi ».

-« Cusì mi pari di veda megliu. Possu incalcà  dinò più forti ? »

-« Innò ! chì ni sentu !  Vedi : avà sò  in celi davant’ a porta di u paradisu. Vedi bè ?

-» Innò ci voli ch’e appoghji di più ! »

-« Sè mantagatu o Tignusè ! Aghju i pedi in sangui !Appoghja menu forti ! »

-«  Dopu dopu ! Appoghjemu dinò ! Cusì  avà u vecu. San Petru hè nant’à porta è faci entra u me babbu !  Socu più chè cuntenti o Sgiò Curà. Grazie pà eddu.”

 

Tignuseddu, lenta a funi di u sameri sempri carcu è faci pà andà si ni ma u Preti hè scuntenti !

-«  Comu ? Avii prumissu u granu è avà u ti porti ? Babbitu hè cuddatu  in paradisu è tù devi tena a to parola. Eiu aghju tinutu a meia ! »

-« Cuddatu...Sè ancu eru sicuru. Ma ùn aghju vistu nudda !  Ma pà issa volta vogliu creda a vostra parola. Vi salutu o Sgiò Curàa, è tanti ringraziamenti. »

-« chì cristianu sè ? T’aghju da scumunicà ! È faraghju vultà u to babbu in purgatoriu. »

 

- »Babbu u cunnoscu bè. S’edd’hè ghjuntu in paradisi, mancu Cristu ùn lu pò fà parta.Tanti saluti o sgiò Curà ! »

 

U Preti,  chì cridia di taruccà lu, s’è fattu taruccà ! Tignuseddu ùn hà vintu nudda, fora a cuntinteza d’avè vindicatu tanti povari ghjenti chì erani stati taruccati pà u Preti, cunnisciutu pà i so faccendi. 

 

Sta sera in caffè, dopu a partita di scopa, Tignuseddu  cuntarà  a passata, è farà scaccanà tutt’i so cumpagni.