Veranu d'Eric Barre

Ridu cun tè veranu ch’à la vita 
Li faci festa è soni lu rinnovu
Vecu sbuccià a stonda preferita
O pampasgiolu eccu chi ti ritrovu

A terra sgrigna affaca una filetta
A marosuli verdi fascia tuttu
L’acellu sà chi u tempu ùn aspetta
Per accasà l’amore è fanne fruttu

Bellu chjarasgiu in velu di spusata
Ti spogli fiocc’à fioccu à lu trattu
L’apa di tè ne face un’abbracciata
Muscu di mele è di fior’in barattu

Da l’ortu colla un prufume di terra
Un raggiu tepidu disceta a lenza
S’apre u solcu  in un ballu di merra
E l’omu ci sumena ogni sperenza