Creatu da Ghjuliu Bernardini è cantatu oghje da Cathy Campana

Ti scrivu à tè fratellu paisanu 
Per ditti quant'hè tristu lu mio core, 
Ti mandu assai suspiri è ti stendu la manu 
Ma dammi torna tù un segnu d'amore 
Tornati versu mè, t'aspettu à lu veranu 
Ùn lascià più fratellu, u tempu corre 
Avvicinati à mè, ùn stà luntanu.
Ùn dorme più tranquillu è spenseratu 
Quandu si chjove a porta di a prigiò 
Digià fratellu nostru hè imprigiunatu 
Per avè solu dettu è cun ragiò 
"Vogliu stà in terra corsa induve sò natu 
È per fà piazza à l'altri ùn mi ne vò 
Chi vive è more corsu, mi sò ghjuratu !".
Avveniti a dulcezza di a nostra mamma, 
È lu so core sempre in alegria 
Oghje di tanti strazii ella si lagna 
Elli dicenu "Amme è cusi sia !" 
Tù ùn poi lascià la more cum'è una cagna
 
Fà la per cumpassione, torna una cria 
Chì per l'ultima volta ella ti chjama.
Ma s'è t'ùn faci prumessa, è quì ùn ritorni 
Ùn sunerà chè dolu u campanone 
Ùn viderai mai più fumà i forni 
A panca serà nuda, spintu u fucone 
Truverai strangeri in li to cuntorni 
È senza fiori in manu ma u bastone 
Pensu ch'averai capitu i mio frastorni.