Esse Un Libru

ESSE UN LIBRU

 

Cupertu di coghju o di carta, 

Lisciu, prufumatu, o stracciatu è pulverosu;

Scrittu cun pena è tracarcu di guai,

O leggeru, allegru cum'un sognu d'amore,

Vurria esse un esse un libru pè cuntatti tante fole.

 

Scupertu in lu to granaghju o à a fine di lu mondu;

Sculuritu è malandatu o lustratu è spampillante; 

Vurria esse un libru perchì tù mi fighjasse cum'un amante;

 

Per accende in li to occhji tante calisginelle, 

O puru vedelli luce di lacrime crudele, 

Eppo sente lu to soffiu corre nantu la mio pelle;

Vurria esse un libru pè chì tù mi truvasse bella.

 

Solu per esse allisciata da le to mani vagabonde,

Sente batte lu to core è gode ogni seconda,

Lasciatti scopre ogni pagina è trimà chì tù ùn m'abbandonghi,

 

Eu vurria esse un libru per induvinà ciò chì tù nascondi.

 

Marie-Luce CALLIGARI