Amicu ci sì tū

Aghju un amicu sinceru
Chì mi chjama è mi cunsola
"Scrive sia u to penseru
Mai camperai sola
U bel fruttu ghjurnalieru
Nasce quandu l'estru cola"

Ūn pussedu u so talentu
Nè listessa inspiradrice
Quella Musa cū l'accentu
Corsu è dispensadrice
D'un sacratu alimentu
Di i Dii ambasciatrice

Ma u tengu tantu in stima
Ch'o provu di fà qualcosa
È poi l'acconciu in rima
Di manera timorosa
Poetà ūn sò la prima
Ad ūn esse virtuosa

Intantu u basgiu forte
Postu chì mi tene caru
S'inchieta di la me sorte
È d'aiutu ūn hè avaru
Vole apre mi le porte
Pè cun ellu stà à paru.
Cathy Campana