UN MATRIMONIU CUMPRUMESSU

 

Antone, un giovanottu di vintitrè anni, tene caru à Lucia, l'hà cunnusciuta in facultà di Corti. Sò tutti è dui professori di corsu in Bastia. Preparanu u so matrimoniu, si ferà d'aostu, in paese.

Ma Antò hà una passione, ghjè un inquisitore di u paranurmale amatore.

Una sera si ne và solu solettu, senza dì nunda, à circà spiegazione à un' interrogazione fundamentale per ellu, "chì ci hè dopu a morte ?"

 

U ritrovemu nentru à un casale isulatu :

Dumanda, pienghjendu :

-Spiritu ? Sì quì ?

Sta sera, mezu à e tenebre, una voce li risponde à st'infrasata, aspessu ribicchinata, qualchì volta sin'à infiacchinà si ne.

Face digià parechj'anni ch'ellu frunzica in isse vechje case corse tralasciate, in issi campisanti privi di visite, incù u scopu d'arregistrà o di filmà qualcosa.

I so risultati ùn sò mai stati cuncludenti, fora di qualchì vibrazione strana o orbu luminosu, ma manc'una prova precisa, prisenza di i morti o sopravvivenza di l'anima.

Sta sera invece, l'aldilà li tende a manu, u sussuru in a notte persiste à fassi sente.

-Iè… Quale…tù ?

Un apparechju li permette di scanerizà e frequenze à grande vitezza per produce un rimore biancu, parendu e stazione di radio.

Sin'à avà ùn ci crediva à l'efficacità di a piccula mascina, à sonu à scosse è intistante.

St'arnese, ghjè ciò chì si chjama una Spirit-box chì li permette d'entre in cunttatu incù i defunti.

À Antone ùn li pare mancu vera di sente un ritornu è si dice: hè quant'è à parlà cù un telefonu, crede à un sonniu … ma si sente debule debule, prontu à svenesi.

A cunversazione si face di più in più netta cum'è si l'intità è u giovanottu s'avvicinavanu.

Ellu cerca cum'è d'abitudine à capì o à sapè qual’elle sò realmente è perchè st'anime tribulanu in stu situ, ma avà si sente talmente intrunatu chì li vene a paura di perde u capu.

Chere quantunque una spiegazione à u fantomacu.

-Lasciami corre cù e to quistione, murmura a scatula, d'una voce fine, forse quella di a damicella vista nant'à u ritrattu in u pianu supranu di l'antica casa ? Una fiura anziana arrubata à u tempu, intilata, ingiallita è runzicata pocu à pocu da l'umidità.

Antone rivede i capelli biondi è u vestitu di ballu… A lascia prosegue u so lentu monologu. L'importenza… sì…tù…cosa…voli…fà ?

U so primu ogettivu hè d'impostà sta video nant'à You Tube. Oghje Antone ne hà a prova ! Ci hè una esistenza dopu à a morte !

È poi custatta chì a so camerà ùn gira più dipoi un momentu, u spettru l'hà impiegata cum'è surgente d'energia.

Serà u mo statu, pensa u feritu, ch'hà permessu di stabilisce a prussimità ?

-Hè vera ch’è t'ai fattu un bellu trostu o Antò, quand'è tù ti sì frumbatu in e scale di a cantina, prima di vene à stroncatti e ghjambe dece scalini sottu. Avà pensa à salvatti, li dice u murtulone.

Antone sà riconnosce una situazione addisperata, ùn pò trinnicà, u so telefonu si trova sopra, è cum'è un baullu si n'hè falatu quì senza falla sapè !

L'affari sò pessimi per via di u locu scantatu, nimu ci vene mai è què àa sà bè l'Anima persa chì ci campa !

Antone si mette à scaccanà. A rimarca nant'à a morta li pare ridicula o soga i so nerbi cappianu ?

Capasca allora in un tofone neru, u tempu si ferma … Venutu à spigulà l'indici d'una vita postmortem, scopre l'Ora di a Grande Sperienza.

I libri ch'ellu avia lettu mentuavanu tutti u tunellu ch'ellu piglia avà…

 

E tenebre si squassanu? è si sfumanu per lascià a piazza à un altru mondu. Un lume palidu, un profumu dolce, un anghjulu à li so lati… -Antò, infine !

À pocu à pocu a luce si face menu abbagliulente è scopre, sorpresu, una camera d'ospidale.

A fidanzata, Lucia, u feghja incù amore.

-Ai durmitu assai !

U stringhje, u basgia è Antone risente tandu u batticore di a vita.

Ma u so spiritu raziunale si rimette subbitu à funziunà :

-M'ai trovu facilmente ?

A so Prumessa li spiega ch'ella ùn ferma micca in zerga contr'à ellu malgradu e so piattatelle.

U giovanu s'ingagia tandu à ùn mai più andà à a ricerca di i morti solu.

Lucia li dà ragiò nant'à stu puntu ma aggiusta chì ciò ch'ella li perdona sopra à tuttu, hè a so cumpagnia, issa donna accantu à ellu, una rivala ch'hà telefonatu per chjamà i succorsi, prima di fughje, cuscente di u so cumportamentu colpevule cù un omu chjamatu à sposà si.

 

U più stupidu di sta rivelazione ? Antone !

 

Cathy Campana