Una volta u diavule s'era messu in capu di piglià per sposa una bella è dolce giovanotta ma a so futura socera avia d'altre intensione. -"Entri qui in sta pignatta, t'aghju da amparà u galateo, tuttu Diavule chè tū sì ! Una donna cum'è mè ùn hà paura di nimu, mancu di Satanassu ! Ai da  capì in furia quale sò, viderai ciò chì pò riprisentà un infernu à modu meiu ! "

U Diavule stridava, dumandendu à a donna di lascià lu esce.

-"Sè tu mi cappii, mi n'anderaghju subbitu subbitu è mi scorderaghju ancu di u nome di a to famiglia !"

Mammasò, maligna cum'è a volpe avia un'idea per prufità di sta situazione è riesce à trasformà in bè un male.

In fatti, s'era fermata veduva giovana . Si dicia cusì chì Signor' Diavule feria un bellu maritu s'ella era capace d'adirizzà lu. Di tutta manera ùn pudia diventà quellu di a so figliuluccia cara, niscentre cum'è l'agnellu  !

Invece ella...

Ella, si sentia capace di mette à u passu issu demoniu. Omu à sà chì tira più un pelu di donna chè un canapu di bastimentu !

Fù cusì chì a maligna sposò u so bel'omu è u  fece filà cum'è un stragliere.

U Diavule si scordò di l'Infernu, divintò un cumpagnu di i piu fidi è di i  più innamurati.

St'unione strana fece nasce una banda di zitelli indiavulati chì currianu in u paese empiendu lu di gioia è di rise.

Voi chì leghjite sta fola, forse l'avite scuntrati, senza imaginà chì sta famiglia à l'aspettu normale era u fruttu d'un'unione malefica.

Cathy Campana ( A mo versione persunale di a fola "U diavule in a pignatta".)