Un scrittu di Maria Martina Casanova

- “ O Madonna! O per i Santi! O zitè! O zitè!
- Ma ch’averei à mughjà cusì à l’ora di a siesta?
- O figliò! O zitè! O Madonna! Avà l’affare ùn pò più durà! ”

U corciu Ghjuvan’Maria ùn sapia più chì mondu… Era persu cumplettamente! In cinquant’anni di travagliu, era a prima volta ch’ellu li accadia un affare simile…
U figliolu, Petr’Antone, circò à sapè ciò chì si passava, ma ùn ci era manera, u babbu avia dighjà saltatu à cavallu è, à galoppu serratu, falava per u pratu versu u stazzu di i Suchjalatte.
« Hum! Aè! Chì ci serà avà! Sempre cusì! Tamant’affare! » pensò Petr’Antone.

E cose ùn avianu tantu cambiatu, vinti cinque anni ch’ellu ùn avia più vistu sti lochi, è eranu sempre listessi. Ci era sempre u pratu suttanu, incù i stazzi di i Suchjalatte, è u pratu supranu incù i stazzi di i Manghjacasgiu.
Ghjuvan Maria Manghjacasgiu, u Babbu! Sempre listessu, sempre azezu!
È e fucilate dinò si facianu sempre sente. È eccu à Ghjuvan Maria chì ricullava…
- « O Bà! Ma sì scemu! T’aghju dighjà dettu di piantà incù stu fucile!
- Tù! Stà ti zittu! Monsieur u fliccacciu! Ùn ai micca à dà mi lezziò tù! Ùn sì micca tù chì m’ai dà amparà à campà in paese meiu! »

Eccu! Ci simu! Avete capitu! U nostru corciu Ghjuvan Maria, sempre azezu dapoi vinti cinque anni! Sò vinti cinque anni avà chì u figliolu si lasciò capre è stazzu per diventà « capitaine de gendarmerie » cum’ellu dicia ellu! È perchè? Perchè era allergicu à u casgiu « soi disant »! Ma cumu era pussibbule d’esse allergicu à u casgiu? Esse allergicu à u casgiu indù una famiglia di pastore? Ma cumu Ghjuvan Maria avia pussutu fà un zitellu cusì imbastarditu? A si dumandava tutti i ghjorni dapoi vinti cinque anni.

Ma oghje, ùn era u fattu chì u sò strampalatu di figliolu appia muntagnatu per trè ghjorni chì li mettia u ciarbellu in ciambrusca, era piuttostu chì dapoi uni pochi di ghjorni, mancava tutte e matine, una decina di casgi in casgile. Ùn era mai accaduta in cinquant’anni di travagliu! È ellu, ben’intesu, dubitava ch’elli ùn pudianu esse chè quelli Suchjalatte à avè fattu u culpacciu. Avia dumandatu à u vechju, ma ellu, chì si rallegrava di a disgrazia chì tuccava à Manghjacasgiu, u so nemicu di sempre, s’era campatu di rise è l’avia lampatu fora à fucilate. Ghjuvan Maria era ricullatu più arabbiatu chè mai, decisu à vindicà si, è Petr’Antone, cuntentu cum’è un pichju, sicuru ch’ellu puderebbe infine mustrà ciò ch’ellu valia, lampò à u babbu :
- « L’inchiesta o Bà! Ci vole à fà un’inchiesta! O Bà! Casca bè postu chì sò quì! Ti rendi contu, quessa pò allora! Casca propiu bè! Pare fatt’ apposta! Tamant’affare!
- Và à fà ti dui fruli o Manghjamè! Ùn vedi micca ch’ùn aghju bisognu di tè! Mi dumandu ancu ciò ch’è tù sì cullatu à fà quì…
- A mi dumandu anch’eiu… Ma avà postu ch’o ci sò, t’aghju da aiutà o Bà! Casca bè! Aè! Mi tocca à piglià a to testimunianza.
- Iè, fà u piacè, piglia piuttostu u pughjale appressu à ste trè zighine… »
Dilusu, Petr’Antone vultò u spinu, decisu quantunque à fà a so inchiesta è pigliò a falata versu u stazzu piglianciu per circà prove.

Petr’Antone entrò in casetta è si truvò nasu à nasu incù Carlu Maria Suchjalatte, chì li lampò un sguardu neru. Anu parlatu una stondetta è u vechju, assicurendu li ch’ell’ùn avia nunda à chì vede incù st’arrubbecciu, invitò u gendarme à andà in casgile per verificà.
U prublema era chì, purtatu da ùn si sà chì pudere, Petr’Antone s’era scurdatu cumplettamente di e so famose allergie, è supitu à l’entrata di u picculu spaziu induve maturanu i casgi, pigliatu da a vampata di a centina di belli prudutti muntanacci chì aspettavanu quì, cascò nettu in terra. O e rise di Carlu Maria! Corciu tippu! È sopr’à tuttu corciu babbu! Ohimella! Ah sò belli i gendarmi! Sò belli i Manghjacasgi! Briunò u vechju.
È eccu ti à brisgioli tamanti à baiocche chì spuntavanu à nantu à a faccia di l’invistigatore! È e so mane chì ingunfiavanu cum’è busciche! Rossu di vergogna, piglia è scappa in furia in furia, mentre chì l’astru si sbillicava à nant’à a muraglietta di a casetta.

- « O Bà! Avà ne sò sicuru! Ùn pò esse chè ellu! L’aghju vistu à a so manera di fà è di parlà, u tippu hè scherzosu, malignu, ma eiu, ancu di più. Ùn ci scurdemu chì sò « capitaine de gendarmerie »! A ti dicu eiu, chì prestu ride prestu pienghje, l’aghju da amparà eiu! Lascia fà à mè, u manderemu in calamicornu à piantà zucchini! Faleraghju in paese à circà l’aiuti.
- Iè iè, s’ella ti pò fà piacè, fà puru cusì, a sapia eiu! Sò anni è anni ch’o scumbattu incù sti scalzacani! A sò ciò ch’aghju da fà, stà à sente…»
È Ghjuvan Maria si messe à accuncià u so affare, à a so manera…

U lindumane, torna i mughji. Ma sta volta, ùn eranu listessi, eranu piuttostu stridi di gioia maligna è scherzosa. U vechju Manghjacasgiu saltava cum’è un sarpellu… Ghjust’à puntu…
Avia ingutuppatu trè casgioni di quelli belli profumati, incù i so « abitanti »… È eranu spariti! Eranu spariti! Haha! U ladrone era sempre vivu!
- « U chjapperaghju per stu pratu quand’ellu correrà in furia per andà di corpu! Haha! »
Avia messu indù i casgi unu di i so sicreti à ellu. Avà era fatta! Tamant’affare!
U figliolu impiaghjò prestu per circà l’aiuti, cusì avianu da chjappà lu in bella pustura stu furdanu! Chì bella vindetta per u babbu!

Falendu per chjassu, u nostru gendarme sentia l’affannu chì li venia, è pò e pusteme chì sbucciavanu à nant’à e so mane, si sentia ingunfià dapertuttu… « Oh oh? Ma chì ci serà? Seraghju allergicu ancu à e filette avà? » pensò in sè stessu. Si pusò sottu à un fagu u tempu di ripiglià fiatu. Ne prufittò per guardà in giru à ellu, sta muntagna custì era sempre cusì bella, in vinti cinque anni, ùn avia cambiatu un suppulu, anu sappiutu prutege la. Chì fideghju! È pò, oh oh! Chì si vede girendu u capu, piattatu in daretu à un scogliu? Una spezia di pumataghju incù unu di quelli famosi « sac au dos »! Ma micca un saccu cum’è tutti l’altri, di quessu surtia un tanfiu impussibbule! Un tanfiu di casgiu muntanacciu! O cari! O l’affanni è i svenimenti per Petr’Antone! L’omu, di pettu à stu spitaculu, esce di u so appiattu è vene à truvà u disgraziatu. Ellu ùn ne pudia più, avà affaccavanu ancu sti brisgiolacci!
- « Ma dite mi appena, chì fate incù tutta sta robba periculosa à collu?
- Travagliu per a fabrica CCW!
- A fabrica CCW? È cosa hè què?
- A fabrica Casgiu Corsu in the World! Ùn cunniscite? Ci simu stallati in piaghja. Quist’annu a moda hè à i casgi muntanaccii. I giappunesi ne sò scemi! I mandemu quallà, hè per quessa ch’o sò cullatu à piglià li quì direttamente à u pruduttore, hè megliu capite, ma ùn hè tantu faciule per avè li, ci vole à cunnosce appena di mondu capite…
Tuttu diventò chjaru chjaru in capu à Petr’Antone.
- Iè, capiscu bè… È… Serebbe pussibbule di vede li sti famosi casgi cusì bramati? »
L’omu apre u saccu è u nostru inchiestadore scopre casgi ingutuppati… Ne apre unu è si vede chì ci sò i sarpelli chì saltichjeghjanu à nantu. Ricunnosce quì a trappula tesa da Ghjuvan Maria Manghjacasgiu!
- « Oh sò boni boni quessi! Avete da capì s’è voi ne manghjate un pezzu! Au nom de la loi je vous arrête!!! »

È ghjè cusì chì Petr’Antone u strampalatu scubrì a pignatta!