Tornu oghji.....

Tornu oghji in Corti. Deci anni chì ùn eru più rivinuta, dopu avè arristatu i mè studii di corsu nantu un colpu di estru. Sò quì, dunque, in faccia à a facultà di lettari, forti di i me annati di travaddu à u cuntattu di i ziteddi, mi sò dicisu a ripidà u me cursus, è mi ritrovu cù studianti più ghjovani chè mè.Più m’avvicinu di u sicritariatu, è più mi dicu chì tuttu hà cambiatu. Frattempu t’aghju un « flash », eu a dicennovi anni marchjendu versu l’uffiziu senza sapè esattamenti chì branca sciuarà, versu qual’avvenu andà !

Podassi chì i cosi chì no avemu vissuti si tinghjani di nustalgia . Suetu a me strada, falu sti scali tamanti è mi chjappu a imaginà mi più micca deci anni nanzi ma à a riapartura di l’università indù tuttu era da fà ; a sensazioni chì duvia essa risintuta da i studianti corsi, dì sapè chì ùn avaristani più bisognu di lacà a so tarra pà fà i studii ;è di i parenti assicurati di sapè li à vicinu in casu mai.Tempu forti pà a noscia lingua, cusì spessu disprezzata attraversu a so oralità, chì ritrova i so lettari di nobiltà principalmenti indè i canzoni di «  Canta u Populu Corsu” è d’altri. Dopu avè impiutu i me cartulari piddu a decisioni di lacà a vittura è d’andà a ghjirandulà ùn pocu in paesu ;vocu versu u cursu pienu di vita incù i so osterii è i so caffè, pieni à tappu di studianti, ungnunu risintindu issi mumenti comu unichi, cù a spiranza di cambià i cosi ; quista manera di vulè rifà u mondu, chì ùn hà l’aria d’appartena cà à i ghjovani grazia à u so entusiasimu è à a so innucenza. Eppuru, cuntinuendu, fighjolu a cuddata chjappettata chì porta à a ghjesia cù u so imbrogliu di stretti, è pensu a l’anziani chì erani prima à no è mi trovu traspurtata à l’epica chì pà andà d’un puntu à l’altru di Corti u solu mezu era in più di i so ghjambi, u spinu di mula. Riflettu, annantu à u cursu, un caminu solu, chì i pastori piddaiani cù a so banda ; è quì i funtani, i donni vistuti in neru andendu à circà l’acqua, sta ghjenti sarà stata cuntenti di u prugressu d’u so tempu o avarà avutu in u stessu tempu a feda melancolica di u passatu di i so parenti ? Vocu più in davanti, sin’à a piazza Paoli, cù a statua di st’omu impurtanti, è i me passi mi portani à u Palazzu indù s’hè scritta una parti maiò di a noscia storia ; quandu entru drintu u casamentu, mi trovu traspurtata à quiddi tempi cusì ricchì di a storia di l’isula, quì n’i stanzi indù tantu decisioni sò stati presi, vicu à Pasquali Paoli, in tornu à iddu i so partisgiani, numendu Corti, capitala di a Corsica indipendenti, hè quì chì pidda tuttu u valori di a custituzioni corsa ; quì ind’è stu paesu cù a so citadella chì pruteghji, abbastanza alluntanata di u mari chì facia entra l’invasori dapo i seculi . Imaginu issi omi pronti à tutti i sacrifizi parchì l’isula sia infini libara, a speranza chì si leghji nantu i so visi … Solu pà un mumentu risentu a forza chì esci di sta vulintà ; po pensu à a battaglia di Pontenovu chì dicisi u nosciu distinu. Rivinindu à u prisenti ferma un sintimu di qualcosa chì ùn s’hè micca realizatu, ma andendu à a me vittura mi dicu chì ùn ci pudia essa meddu scelta cà iss’epica, chì si riuniani omi, chì riflittiani insemu è scumbattiani pà u so locu, è avà hè quì chì a nuvella generazioni veni pà studià, un’altru modu pà fà sviluppà u paesu. Ch’iddu si venghi da paisoli sfarenti di Corsica o d’altrò, Corti, paesu di scambiu, di scontru, di barattu di idei è di emuzioni, faci chì ci sintimu bè, cusì bè chì ci sintimu comu in casa noscia.