Marina di Giottani, estate 1961

A mo mamma era una donna curagiosa, generosa è amante chì hà affruntatu e prove di a vita cù forza è dignità. Era sempre pronta à aiutà à l'altri, senza aspettà ne nunda. Hà datu u megliu di ella stessa à a so famiglia, à noi i so figlioli.

A mo mamma era una donna dolce è calurosa, empatica è piena di vita chì hà sempre fattu tuttu u so pussibule per aiutà à l'altri. Era una donna fiera è degna chì avia una vera sete di vita.

Sapia rende a ghjente felice cù a so gioia di campà è u so umore. Sapia apprezzà e piccule felicità di a vita d’ogni ghjornu, cum’è una bona manghjusca, un bichjeru di vinu di tantu in tantu, una canzona chì li piacia. Soprattuttu, li piacianu i zini, e lapare è i fichidì. È ballà, ch’ùn si ne parla, sin à…

L'8 di maghju di u 1994, u ghjornu di i so 57 anni, u destinu li hà ghjucatu un bruttu schernu. Nantu à a strada trà Nonza è Olmeta di Capicorsu, a so vittura hà sguillitu in una girata è hè cascata per u fundale à 40 metri sott’à a strada. Da tandu, fù paraplegica, ma mai scunfitta. Hà affruntatu a so disabilità cù una vuluntà di ferru è un curagiu esemplariu chì ùn pudia chè furzà a nostra ammirazione. Era una fonte d'ispirazione è rispettu per mè.

Era una devota trà i fideli di "Dite à vostra" l'emissione di dopu meziornu nant’à RCFM, ma più chè tuttu, era assai assai chjesulana. A so fede era a so forza. Ogni matina, recitava u so paternostru per ore sane senza scurdà si ne di nimu, puru di Doushka, u so gattu, è dinù ogni dopu meziornu cù a radiu Salve Regina… è attenti à quellu chì a disturbava in quelli mumenti.

Mi ricurdaraghju sempre di i nostri Natali in famiglia, a chjesa, a messa di mezanotte, a tavula messa da Babbu quandu turnavamu in casa è quella meravigliosa sensazione di esse tutti inseme, u ceppu in u caminu, u ramu di pinu tagliatu da Babbu in a machja chì servia di ghjalicu in u scornu di a sala à manghjà, u presepiu tamantu cù figurine chì datavanu di a so zitellina è chì mi tengu sempre.

S’è a mo mamma era eccezziunale, à i mo ochji almenu, era perchè chì hà avutu à suppurtà assai prove in a so vita. Mamma hè nata in u 1937, hè cresciuta in una piccula casa in Canari cù a so mamma, Maria-Catalina, è u so fratellu Francescu. Perse u so babbu prima di a Seconda Guerra Mundiale quandu era sempre una zitelluccia. Eranu tempi difficiuli, ma eranu tutti assai forti è si la franconu cum'elli pobenu.

A mo mamma hè stata accrianzata in u rispettu di i valori tradiziunali è hà amparatu e cumpetenze d’una donna di u so tempu - cucinà, cosge, triccuttà. M’arricordu ch’ella ci triccuttava vestiti calli per l’inguernu, ô quanti ! A rivecu, triccuttà, arritta, aspettendu ci à a surtita di a scola.

Per aiutà a so mamma hà travagliatu duru à un’età assai giovana, frà altre cose, in a pensione ghjustu accantu à a so casa induve era particularmente apprezzata da u mo babbu perchè chì hè custì chì si sò scuntrati per a prima volta. Babbu era ghjuntu di e Francie à travaglià à a mina di Canari à l’età di 21 anni è allughjava in issa pensione.

A nostra mamma ci hà amparatu assai cose quand’eramu chjuchi chì ci servenu puru oghje : una bona educazione, u rispettu è forti valori murali. Issi valori anu fattu di mè quella chì sò oghje è li ne sò assai ricunniscente. Era una donna fiera è forte chì hà cridutu chì ùn ci era nisun ostaculu abbastanza altu chì ùn pudia esse superatu senza curagiu è determinazione.

A mo mamma hè sempre stata u mo sustegnu, a mo forza è u mo cunfortu in i tempi difficiuli. Ùn sò micca cumu facciu senza ella - hà lasciatu un viotu cusì grande in a mo vita, ma cuntinueraghju à piglià a mo forza in ciò chì m'hà amparatu: l'amore.

Ti tengu cara mamma, mi manchi tantu. Eri un mudellu per mè, m'ai amparatu à esse forte, à esse generosa è à esse felice. Sì sempre stata quì per mè, in i tempi boni è cattivi. Ai fattu di mè a persona chì sò oghje.

Sò chì ti ne sì andata, ma fermi in u mo core è in i mo pinsamenti. Sò chì veghji nantu à mè è quelli ch’è tù teni cari. Sò chì sì in pace è chì sì felice, liberata di stu corpu chì t’hà tenutu prigiunera per 28 anni. Un ghjornu ci ritruveremu, o Mà.

Grazie mamma, per tuttu ciò ch’è tù ai fattu, per quella ch’è tù eri, per tuttu ciò ch’è tù sì sempre.

À sta donna eccezziunale chì m'hà sempre ispiratu è à quale devu tuttu,

À sta donna, creativa è rigurosa chì m'incuragisce à cambià u mondu,

À a mo migliore amica, sempre dispunibule è attenta chì m'hà datu i cunsiglii più preziosi è pardunatu i mo sbagli,

À sta mamma curagiosa è forte chì m'hà prutettu cù tutte e so forze è chì m'hà amata di tuttu u so core,

À sta mamma attenta è generosa, chì hà sempre avutu una parolla per cunsulà e persone chì attraversavanu e prove dure di a vita,

À sta mamma tulerante è friziunosa chì m'hà accrianzata in l’amore di u vicinu è u rispettu per tutti,

À sta mamma esigente è ambiziosa, chì hà guidatu i mo passi è chì hè à l'origine di tutti i mo successi,

À a mo mamma chì m'hà datu tuttu, ti teneraghju sempre cara.

Issu 16 di ghjennaghju, sò dui anni chì ci ai lasciati, lascendu un viotu spalancatu in e nostre vite è in i nostri cori. Ti tengu tantu cara, o Mà, è mi manchi più di ciò chì e parolle ponu sprime.