Ultimamente, Ghjuvan Guidu TALAMONI hà datu una cunferenza nantu à a so tesa di dutturatu sustenuta di decembre scorsu à l’Università di Corsica è rimarcata da a ghjuria cù e so felicitazione.
A presentazione di issu travagliu interessava di sicuru u publicu di u CCU è i studianti di u DU Patrimoniu, furmazione principiata hè pocu in Corti.
Di sicuru u patrimoniu literariu è e forze chì ci sò à l’opera hè un sugettu attu à primurà issu publicu. Presentemu in trè sequenze videò issu pensà ch’omu spera di pudè ritruvà prestu in u libru chì l’autore si appronta à edità.

U cunferenzeru inizia cù una spechjata di u fenomenu literariu corsu in diacrunia. Ci si vede sgrignà u fattu literariu è po sviluppà si à traversu l’epiche è e varie spressione, linguistiche è pulitiche di a sucetà corsa. Hè cusì chì à pocu à pocu vene rifinita una cuscenza di spressione maiò in lingua corsa, ma issu sboccu hè preparatu cun varie fase chì si elabureghja un imaginariu naziunale di u populu corsu puru in altre lingue. Trattendu si di u corsu, GG.TALAMONI insegna quantu l’affirmazione d’issa lingua dipende ancu di e circustanze pulitiche. Issa attenzione à u legame sociostoricu u porta à mette in critica a nuzione di Riacquistu (quellu di l’anni 1970) punendu ci prima l’ipotesi di un Primu Riacquistu spuntatu à a fine di u 19 u è sbucciatu in a prima metà di u 20 u. Cù issa pruposta teorica mette in cuntrastu a nuzione è afferma un’interpretazione maiò.

Di fatti, in quantu à ellu, sò unu è l’altru duie Rinascite chì avianu listessu scopu : permette à a Corsica di ritruvà i so attributi culturali è pulitichi.