Eramu in lu quaranta trè
U focu era universale
Arritti s'eranu tant'omi
Daret'à la fiamma nustrale
Rispudendu à la to chjama
Cù lu Fronte Naziunale.

Tutt'ognunu s'eranu adduniti
Contr'à quell'indegnu macellu
Più di un giuvanottu arditu
È donne, i vechji è li zitelli
Sottu à la bandera libera
Quella di li Corsi ribelli.

Di a libertà di u mondu
Ne fusti un bellu sullatu
Contr'à e milizie fasciste
S'hè spentu fieru lu to fiatu
Quand'una matina d'aostu
Tù morsi degnu è rivultatu.

Da e cime valle à e piane
Chjuccavanu tante ciccone
A rivolta fù pruclamata
Intornu à lu vechju fucone
È in un frombu di fucile
Fù salvata a vechja Nazione.

Eu quandu vecu l'inghjustizia
Cum'elli à ci volenu impone
Quantu mi pare sempre viva
Quella lettera testimone
Ch’è tù ci ai lasciatu un ghjornu
In lu fondu di a to prigione.

Oghje u to populu hè sempre in lotta
Per una causa universale
Hè sempre rittu u to figliolu
Rossa hè la fiamma nustrale
Chì schjarisce la strada nova
Di u Fronte Naziunale.

Tù Dumenicu

D'ottobre in Zerubia a luna hè cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à Siò marchjanu clandestini

E tù Dumenicu, ribellu di cugnome
Chì ùn vulia mai dorme

E vostre le vittorie eranu silenziose
A gloria a sai bè, ùn canta chè u ghjornu
Quantu funu i cumpagni d’isse mosse furiose
Chì partianu fieri senza pregà ritornu

E tù Dumenicu, ribellu di cugnome
Chì ùn vulia mai dorme

È oghje senti dì chì ogni passatu hè mortu
Chì li fiori s'annoianu nantu à e tombe vechje
Chì hè megliu à ùn circà quale chì avia tortu
S'imbrutta la memoria in certe bocche techje

E tù Dumenicu, ribellu di cugnome
Chì ùn vulia mai dorme

Oghje nantu à issi chjassi pascenu i muntoni
Di quandu in quandu i neri intisgianu i bianchi
Chì dicerianu avà Giusti è Mondoloni
È tutti i to fratelli cù i so fucili stanchi

E tù Dumenicu, ribellu di cugnome
Chì ùn vulia mai dorme

D'ottobre in Zerubia a luna hè cusì bella
È u ventu in furesta viulineghja in li pini
A notte di vaghjime aspetta un'antra stella
Da i Martini à Siò marchjanu clandestini

Tù dumenicu
Ribellu di cugnome chì ùn vulia mai dorme

Ghjermana De Zerbi

Canti tradiziunali
(In « Cantu nustrale »)

Maladì vogliu le legi

Maladì vogliu le legi
Maladì vogliu l’editti
Chì soprà sti giuvanotti
Ci piglianu sti diritti
À l’età di vintun annu
Li facenu andà cuscritti.

Maladì vogliu le legi
Quelle di Napuleone
Percosa sti giuvanotti
Senza nisuna ragione
À l’età di vintun annu
Tiranu la cuscrizzione.

Partite lu mo culombu
Andate è state cuntentu
Matrimoniu ùn si ne face
Senza lu vostru accunsentu
Eu per la vostra persona
Ne aghju ricusatu centu.

Lettera à mamma

Mamma risponde nun possu
À e vostre dulente chjame
Troppu miseria aghju à dossu
È mi si rode a fame
Sò prigiuneru languente
In quella Prussia à punente.

Venissi una rundinella
Ch’io la mandi messagera
O venga puru una stella
À purtà la mio preghera
E mio pene, lu mio amarore
Versu voi mamma d’amore.

V’abbracciu per lu penseru
Vi mandu sti versi soli
Dicendu sò prigiuneru
Chì tuttu què vi cunsoli
Mamma la vostra tristezza
À mè dà tanta amarezza.

Voceru per Caninu

Eo vurria chì la me voce
Fussi tamant’è lu tonu
Chì passassi per la foce
Di San Petru à Vizzavona
Per chì soni in ogni locu
La gran prova di Gallonu.

Tutti à lu Lucu di Nazza
Tutti s’eranu aduniti
Cun quella barbara razza
Li suldati è li banditi
Cù a timpesta d’arrimani
Tutti inseme sò partiti.

In fondu di lu rionu
Si sintia rughjà lu ventu
Chì purtava da Isonu
A malora è lu spaventu
Si vidia chì per aria
C’era accidia è tradimentu.

Sonu subitu partiti
Tutti i lupi cù l’agneddi
È marchjavanu aduniti
À lu son di i cialambeddi
Quandu ghjunsenu in la sarra
Ti taglionu i garganeddi.

Quand’eu intesi li brioni
M’affaccai à lu purteddu
Dimandai : Chì nova ci hè(ni) ?
- Anu tombu u to frateddu
- L’anu presu in la sarra
N’anu fattu lu maceddu.

Nun ti valse lu curaghju
Nun ti valse la schjuppetta
Nun ti valse lu pugnale
Nun ti valse la terzetta
Nun ti valse ingermatura
Nè orazione benedetta.

À guardà le to ferite
Mi s’accresce lu dulore
Perchè più ùn mi rispondi ?
Forse timanca lu core ?
O Canì, cor di suredda
Ai cambiatu di culore.

À lu paese di Nazza
Ci vogliu piantà un prunu
Perchè di la nostra razza
Ùn ci passi più nisunu
Perchè ùn funu dui nè treni
Ma cinque omini contrà unu.

Lu mio largu di spaddera
Lu mio minutu di vita!
Cum’è tne nun ci n’era
Parie una mazza fiurita
Solu u pinseru di tene
Or sustene la mio vita.

À lu pede di stu puddone
Ci vogliu piantà lu moi lettu
Parchì quì lu me fratiddone
Ti tironu à mezu pettu
Vogliu lacà lu gunneddu
Vogliu armà schjoppu è stilettu.

Vogliu polvere è cartucci
Per armà la mio schjuppetta
Vogliu cinghje la carchera
Vogliu cinghje la tarzetta
O Canì, cor di suredda
Vogliu fà la to vindetta.