O la mio nave da corsa
Cù e so vele tutte bianche
Ch’avà balla cum’è un’orsa
In l’acque di le calanche!

Cù a so forza abbambanata
Aghjaditu u capitanu
Ùn sà più mancu l’annata
Ch’ella vide u Gran Sultanu.

Quandu parata partia
Cum’è una donna guerriera
E campagne di Bastia
Li facianu sta preghera:

“O cursara Paulina
Ch’ai lasciatu i purticcioli
S’è tù tocchi à sta marina
Truverai altri figlioli.

Chì ci buschi in Berberia ?
Veni quì bella spusata !
S’adunì la Signuria
È per tè ci hè un’imbasciata.

Chì ci faci in altu mare?
Ogni fondu, in Terranova,
Hà più robba e cose rare
Ch’in Oriente ùn si trova.

Quì ci hè armi, ci hè zitelle
À e ringhere di e terrazze,
Tonde cum’è caravelle
È d’amore un pocu pazze… »

Hai intesu ? Ma sì ghjunta
Di notte, è cù la burriana,
U core achjudatu in punta
Di lu maghju di mezana.