A felicità hè in u pratu, induve i ricordi di a mo zitellina si mischianu cù a frescura di u veranu. Hè un ritornu à i principii, un pelegrinaciu in u santuariu di a natura induve ogni sensu si sveglia è si ricorda. I mo ochji si chjodenu per vede megliu l'imaghjine di u passatu, i ghjoculi in l'erba alta, e risate sottu à u celu immensu.

In u stucciu d’un pratu verdicante, induve a guazza di a matina basgia l'erba tenera, u veranu stende i so incanti. I bucci schjoppanu in un focu di culori, i fiori s’aprenu cù un surrisu à a stagione nova. L'aria hè una sinfunia di profumi, ogni ventulellu purtandu l’odore dolce di a terra umida è di i petali fescamente sbucciati.
I canti di l'acelli, simuli à e melodie di tempi fà, m’annannanu l'anima d’una dolce nostalgia. I musicanti d’issu orchestru naturale cantanu i lodi di u rinnovu. E so meludie s’intreccianu cù u murmuru di e fronde è a chjuchjulera di i fiumi, fiurittandu una meludia chì celebra a vita.
E farfalle, cum'è frammenti di sogni scurdati, ballanu in l'aria carcu di ricordi. Ballanu d’un fiore à l'altru, e so ale pinte di dilicati mutivi. Sò i testimoni di a bellezza effimera, ricurdendu quantu ogni mumentu hè preziosu è unicu. È in ‘ssu pratu, induve ogni stigliu d’erba conta una storia, mi ritrovu zitella, currendu scalza, braccie aperte versu à l’orizzonte, circandu à chjappà ‘ssu mumentu, à tene lu preziosamente, cum’è no’ faciamu prima.
U ventulellu leggeru porta cun ellu l'odore di a libertà, una mischju d’aromi di fiori è di terra umida, invitandu u nostru odoratu à un pranzu campagnolu, ma ancu i racconti di verani passati è ogni profume hè una lettera d'amore mandata da u tempu.  A mo pella frizzina sottu à l’ardore di u sole di veranu, scaldendu tuttu u mo esse, mentre chì i mo diti accarezzanu a dulcezza d’un petalu, a raspiusità d’una curteccia, a frescura d’una goccia di guazza. A so carezza nantu à a mo pella raminta i ghjorni spenserati, i dopumeziorni infiniti induve u tempu ùn avia micca influenza. U calore di u sole accarezza a mo pella cum’è un abbracciu dolce è cunfurtante. Hè un ricordu chì, ancu dopu à u più ghjalatu di l'inguerni, u calore sempre torna à riscaldà i cori è i corpi.
In ‘ssu pratu, ùn simu più spassighjatori pressati, ma figlioli di u mondu, ritruvendu cun deliziu i piacè simplici di a vita. A felicità hè quì, paspevule, in ogni soffiu di ventu, in ogni filu d’erba, in ogni mumentu arrubatu à un ritornu à e so fonte. Hè una prumessa silenziosa chì, malgradu tuttu, a natura ferma u nostru primu è eternu rifugiu.
È quì, à mezu à ‘ssa pittura viva, ritrovu i mo sensi. Vecu a bellezza, sentu a meludia, sentu i prufumi, toccu a dulcezza, tastu u mumentu. Hè una cumunione cù a natura, un ritornu à l'urighjine, un istante arrubatu à l'eternità. I mo ochji si perdenu in l’immensità d’issa pittura viva, induve ogni culore pare nasce per a prima volta davanti à u mo sguardu maravigliatu. Hè una felicità tinta di malincunia, quella di a bellezza chì passa, di u mumentu chì fughje, ma dinù di a prumessa chì a natura, eterna cunfidente, serà sempre quì per accoglie i mo sogni è i mo ricordi.
A felicità hè simplice, hè quì, in u pratu, in u ciculu eternu di a vita chì si rinnuva sempre. Hè una prumessa chì, pocu prema e tribulazione di a vita, ci hè sempre un pratu induve arripusà si, induve ritruvà si, induve esse felice.