Quelle fronde degne di i rè è chì muscanu

Ci vole à palisà chì dì solu u so nome face subitu vene in mente tante sosule di delizia imbutrate à sole. U basilicu, un dolce vegetale si puderia pensà propiu mediterraneu  da tantu chì si hà l’abitudine di sente chì u so gustu vene ad accumpagnà e pumate, a mozzarella è l’oliu d’alivu.

È puru ne averà fattu viaghji, francatu seculi muntagne è mari d pudè ghjunghje sinu à ind’è sti piatti nostri.

Ci vole à dì chì andà à circà duv’ellu hè natu hè quantu à ghjunghje in Asia suttana duv’elli l’anu alzatu millaie d’anni fà sinu à fà ne una pianta sacra offerta à Krishma è posta in manu à i morti da accurà li pè quellu ultimu soiu à l’adilà.

4000 anni fà u truvemu dinù in Egittu duv’ellu si face u so bellu postu à l’ombra di e piramide chì i faraoni avianu cumandatu di aghjunghje lu trà mezu à tutte quelle piante di prezzu necessarie in qualsiasi mumificazione.

Torna unepochi di decennii è in Grecia spuntanu e so fronde pigliendu si u pudere stranu: à l’epica si sente à voce bassa chì, à quellu chì ne rispireria l’odore, li nascerianu i scurpioni in u cervellu.

È à l’ultimu, hà da mutà statutu propiu in Roma. Da vegetale appaghjatu à a morte, u basilicu si hà da ritruvà accuppiatu cun l’amore. Dà ne à l’appiattu un asta à quella ch’omu tene cara hà da esse ghjurà di esse li fidatu per l’eternu.

Nomina, da tandu si ne hà da buscà più in più è ancu u so nome chì vole dì “pianta reale” hà da esse simbulu d’issu statu novu.

Hè cusì chì, à l’Età di Mezu, ad avè u dirittu di coglie lu, saranu solu i sgiò è, di caccià si a pena in capu pigliendu ne tisane, a ghjente di rangu altu.

D’altronde, à listessa epuca, issa pianta passa in a categuria di primura l’arumatichi, tandu stimata capace à esse posta in tavuladi i rè è po, seculi dopu, in i nostri piatti scelti.

Siamu una cria indiscreti per finisce: s’è certi pensanu chì e piante ponu esse più belle è più forte s’omu li parla, una legenda dice chì u basilicu, ellu cresce megliu s’omu l’inghjulieghja! Dunque micca penseru s’è un vicinu butuleghja in u so giardinu o in balcone. Innò ch’ùn si annerva, cura u so basilicu, cura...