TERRA NOSTRA - 2 Terra nostra è i so culori

 

Terra nostra è i so culori

 

Mai aghju pussutu capì cum’hè chì omu dice di biancu è neru ch’elli si opponenu à i culori di l’arcuballenu.

Basta à stà à sente l’album Terra nostra di Patrizia Gattaceca è omu hè cunvintu ch’ellu hè tamantu sbagliu ch’ella ci impone l’abitudine di l’idee pronte è leste...

Ma tandu ci hà da vulè à fà un viaghju stupendu tramez’à i culori di a Terra. Ne vulteremu sicuri pè u sempre è prestu prestu rassicurati. Iè, nant’à sta a Terra chì hè nostra. Quindi è po’ ancu in altrò. Sana sana a Terra. Quella duv’è no pedighjemu ogni ghjornu vicinu à noi o più luntanu.

 

U cuncertu ci porta ancu luntanu ma di fatti simu sempre ind’è noi. L’Altru nè ci superisce nè u superimu noi.

Si face u giru di u mondu senza scuntrà nè turisimu tamantu nè maghjine d’aggrancu abbagliente. Si passa per capitale maiò ma chì spechjanu u fundame di i so rughjoni pinti da l’ascoltu chì sente l’accenti cuntinui di ritimi, rime è lingue chì s’incontranu senza discuntinuu. Vicini, ammaniti pè un’intelligenza nata da l’armunie vucale è musicale. Cusì, e terre più luntane s’aprenu pè i nostri sensi. Ci passanu forme è emuzione, maghjine di sensazione è culture cusì vicine è ancu parente, à un puntu ch’ella hè strana.  A capimu subitu subitu. Per via ch’è no a sentimu in a mansa di maghjine create da a puesia, a voce, i soni d’un’urchestrazione   virtuosa ma capita subitu per via di i so effetti nantu à a nostra sensibilità.

            Vene una volta rinfriscati è po’ annacquati è assuvati i diserti cù u dialogu di l’arte. E chjame trà lingue è culture sò intese per via di a so cuntiguità, i cunflitti spianati davanti à a maraviglia di l’eternità di u spettaculu mundiale. L’accordi sò pussibuli per via ch’ella si crea una catena di e spressione chì a so vicinanza stupisce, ch’ella venissi da i sguardi o l’accenti sunori è musicali. È chì nimu venga à cuntà ch’elle sarianu chimere.

U mondu di Patrizia è di i so complici ind’è l’arte ribomba dinù da i passi ch’ella pone a so puesia nant’à u mondu cutidianu di a terra duv’ella campa quella chì canta.

            Sentendu à Terra nostra, a storia individuale mai mai hè scantata... À un puntu tale chì, subitu ch’elli ribombanu i primi accenti, i ritruvemu nant’à quella terra duve l’arte celebranu a vita.