ST’ANNI CORTI

San Petersborgu  hè propiu una cità di sognu. Mi sò firmatu in pienu mezu à u ponte. A cità hè isula, è ùn hè micca metafura di dì la cusì. Sò parechje in issi lochi nordichi duve u delta di a Neva sbocca in u mare di Finlanda. À sente dì sarianu  quarantaduie l’isule è settantacinque i canali è, à l’annuttà, i ponti si alzanu è l’isule voltanu… isule in vera. Dunque ci vole à tene a mente spichita è ùn lascià passà l’ora ghjusta.

Digià ch’o aghju mancatu u spettaculu prugramatu in u Teatru Mariinski. Hè ùn sò quantu tempu ch’o mi ne stò cusì, imbasgialitu davanti à u currente forte è lindu di a Neva…  A sò chì ci vuleria à malfidà si di i fiumi chì correnu : facenu sunnià, facenu pensà. È face un pezzu avà chì mi vene è mi rivene à mente stu filu di sti trenta anni ch’o mi passu in Corti, à l’Università…

(…)

Ùn hè ancu tramontu è u lume calieghja nantu à A Neva. Ùn vi dicu u chjarore chì a si allonga è ùn vole smarrisce cusì prestu. In quantu à mè averaghju passatu meza ghjurnata à sunnià. Ancu di grazia ch’è no ùn avemu sempre sottu à l’ochji spetaculi cusì scelti. Rimarcate chì à rombu di campà ci, a maraviglia ùn vene più à aggrancà l’attività. A sapemu in Corti chì hè megliu à ùn fighjà da a banda di e muntagne maestose, nè u mare in Bastia, Aiacciu, o Bunifaziu duv’elle sò d’acqua impetrata i splendori…

Mi sò lacatu piglià da u tardi. Ùn hè più ora di passà da l’altra banda di A Neva. Anu alzatu i ponti à st’ora quì è varghe ùn ci ne sarà più allocc’à dumatina.

Sti lochi sò isula chì ùn si pò mancu dì…

Ghjacumu Thiers