Mi Chjamu Lesia è sò una giuvanotta di sedeci anni. Campu in Canari. Sò appassiunata d’astrunumia è passu ore sane à fighjà u celu stellatu cù u mo telescopiu. Mi piace à imaginà mondi luntani chì si piattanu daretu à ‘ssi milliardi di punti luminosi è à dumandà mi s’è sò sola in l’universu.

Una sera, mentre chì scrutava u celu da a mo finestra, vidi una stella chì luccicava di più chè l’altre. Avia un culore turchinu intensu, quasi elettricu è paria fà mi un colpu d’ochju. Mi sinti attratta da ella, cum’è s’ella mi mandava un messagiu. Pigliai u mo telescopiu è a mirai precisamente. Fui abbagliacata da a so bellezza, ma ancu da ciò chì scupri : era una pianeta, ma micca qualsia pianeta ! Era quella chì Van Gogh avia pintu in a so famosa pittura « A Notte Stellata » .

Ricunnisci e volute è i mulinelli di u celu, u paese imaginariu, u cipressu è ancu a luna è a stella mattutina. Cumu era pussibule ? Cumu Van Gogh avia pussutu ripresentà ‘ssa pianeta senza avè la mai vista ? Saria una cuincidenza, un feghju o un misteru ? Mancu ùn la sapia, ma vulia sapè ne di più. Pruvai una sperienza scema : tentà di entre in cuntattu cù ‘ssa pianeta.

Mi ricurdai d’un articulu ch’avia lettu nant’à internet, chì spiecava cumu mandà segni luminosi in u spaziu cù un laser. Mi procurai unu di ‘ssi lumi pudenti è u puntai versu à a pianeta. Cumunicava in codice morsu, sperendu chì una forma di vita intelligente mi pobe risponde. Ripiti parechje volte ‘ssu messagiu : « Salute, mi chjamu Lesia, campu nant’à a Terra. È voi, quale site ? »

Aspittai impaziamente d’avè una reazzione, ma nunda si passava. Principiava à scuragì mi, quandu tandu, vidi a pianeta luccicà ancu ella. Mi rimandava listessu messagiu, à l’inverciu : «  Salute, mi chjamu Vincen’, vengu di Van Gogh. È voi, quale site ? ».

Ùn ne cridii i mo ochji. Avia riesciutu à stabilì una cumunicazione cù una forma di vita nant’à un’altra pianeta. È micca qualsia essere : Vincen’, u pittore di « A notte Stellata ». Cumu tuttu què era pussibule ?

Saria un sognu, un’allucinazione o a realità ? Ùn la sapia nancu, ma mi tuccava à cuntinuà a cunversazione !

Li  risposi : « Sò Lesia, un’ammiratrice di a votr’opera. Ma cumu hè chì campate nant’à ‘ssa pianeta ? »

Mi rispose : « Sò Vincen’, un spluratore di l’universu. Sò venutu nant’à ‘ssa pianeta per pinghje la. Hè a più bella ch’ùn avessi mai vista. »

Li dumandai : « Ma cumu avete fattu per viaghjà in l’universu ? ».

Mi disse : « Aghju utilizatu un purtale dimensionale. Hè un passagiu secretu chì rilega sferenti mondi. L’aghju scupertu à casu in a mo camara in San Remi di Pruvenza. M’hà permessu di visità lochi straordinarii è d’immurtulà li nantà e mo tele. »

Li dumandai «  Mi pudete mustrà issu purtale ? Mi piacerebbe à scuntrà vi è vede à a vostra pianeta da vicinu. »

Mi rispose : « Da sicuru, mi piacerebbe à accoglie vi. U purtale hè in u cipressu ch’aghju pintu. Basta à tuccà lu per attraversà lu. Ma attente, ùn stà apertu per assai. Ci vole à spiccià si. »

Li dissi : « Vi ringraziu, aghju da pruvà. À prestu, Vincen’. »

Pigliò a mo pelliccia è u mo saccu, escì di casa per piglià l’aviò per Parigi. Quassù corsi fin’à u museu d’Orsay induve hè sposta quella tela « A Notte Stellata ». M’infrugnai tramezu à i visitori sin’à quellu cipressu. Stesi a manu è u tuccai. Sinti una strana sensazione, cum’è s’o passava tramezu à a pittura. Chjusi l’ochji è quandu i riapri, ùn era più in u museu, era nant’à a pianeta Van Gogh !

Fighjai ingiru à mè è fui maravigliata da ciò chì vidi. U celu era d’un turchinu prufondu, timpestatu di stelle scintillante. U paese era pitturescu, cù e so case à tetti pinzuti è e so finestre alluminate. U cipressu era maestosu, cù e so ghjambone chì si slanciavanu versu à u celu è a Stella Mattutina luccicava di mille fochi, cum’è un fanale in a notte.

Tandu, mi sinti cusì chjuculetta, ma tantu felice. Mi sinti in piazza mea in l’universu. Mi sinti vicina di Vincen’ chì spartia a mo passione per u celu stellatu. U circai da u sguardu è u vidi chì m’aspettava cù un surrisu. Mi tese a manu è mi disse :  « Salute Lesia, siate a benvenuta nant’à Van Gogh ! Sò felice di vede vi. Venite c’o vi mustressi a mo pianeta. »

Pigliai a so manu è u siguitai. Partiimu à a scuperta d’issu meravigliosu mondu chì era u soiu è chì, da tandu, divense u meiu.