INGHJOCU DI I SCONTRI

1-INGHJOCU DI I SCONTRI
1- inghjocu di i scontri...Sò parechji anni ch'ellu si parla assai di e relazione trà e regione mediterranee. Ci vole à ralegrà si ne. Hè più chè ghjusta chì durante tanti anni issi lochi è isse culture anu fattu cume s'elli ùn si fussinu mai cunnisciuti nè frequentati. Sinu à scurdà si chì a vicinanza era durata seculi è seculi. Di fatti, creatu i Stati muderni, fù rotta l'antica continuità culturale trà terre, scambii di ropa, d'idee è di culture. 
Tandu i populi vicini scumbattianu cù altri capatoghji chè di circà à assigurà e sumiglie anziane. In quantu à l'individui, a so vita misurata à palmi di decennii ùn li purghjia a memoria di issi tempi landani. Ne eramu ghjunti quasi à pensà chì e fruntiere eranu state custì sempre sempre. Ci volse à sente mette in ballu l'idea di custruzzione supranaziunale, di circulazione più faciule è più libera in Europa da vede riprincipià a cerca di e sumiglie. /..
2- inghjocu di i scontri ...Trà ghjente di u Mediterraniu, ùn si pò dì ch'è no ci pratichemu assai oghje, ma ùn hè più à fattu cum’è eri. Qualcosa hè cambiatu è pianu pianu rimettimu à frequentà ci trà populi vicini è ancu più luntani. Postu chì l'intenzione oramai ci hè, quand’ella casca, riesce ancu quella azzione. I discorsi ùn mancanu è qualchì prugettu nasce ancu ogni tantu.
Trà Baleare, Corsica è Sardegna, in più di l'accordi sugellati cù l'accunsentu europeu, hè crisciuta pianu pianu l'idea di una cumunutà di cultura è di interessu da fà valè in u quatru generale di l'Europa. Ùn hè ancu prugettu solidu, ma l'urientazione ci hè parsa bona à quelli di u Centru Culturale ed avemu messu à tesse qualchì filu da favurizà un barattu literariu è culturale. Hè cusì chì in u 1997 a nostra Biennale di Prosa literaria si hè allargata da Sardegna à Baleare. Hè dinò cusì ch'ellu si hè purtatu un prugettu pueticu d'intertraduzzione. Isse azzione anu avutu tandu l'accunsentu è l'aiutu di a Cumissione Europea (DG XXII Educazione Furmazione è Giuventu, DGXAzzione culturale)../..
3-- inghjocu di i scontri... Dopu, e cose si sò accertate è a relazione hè diventata propiu regulare... Ci campemu cù issa impressione ch’ellu dà u barattu cuntinuu di puesie, testi, cumenti, idee è prugetti. I prugetti INTERREG chì anu ligate tanti anni fà  inseme regione trasfruntaliere vicine, ci anu permessu di viaghjà, di accoglie ind’è noi è, sopra à tuttu di rializà inseme azzione... tante azzione culturale. U più hè statu in u campu di i u cantu è i recitativi è traduzzione di puesia, è po’ ci hè sempre dinù a cuuperazione teatrale chì ci hà permessu di realizà inseme, cun cullettivi mischjati di autori, attori è registi, parechje pezze di teatru chì anu pussutu girà in Corsica è ind’ e regione partenarie: Tuscana, Sardegna, Sicilia è Baleare.
Ùn hè cosa sempre sfaticata di adunisce spessu spessu ghjente per sopra à e fruntiere è di permette li di travaglià inseme. Simu fieri di avè ci la fatta. Quelli chì ci anu rispostu ed aiutatu sò diventati amichi: ci dà piacè è fiatu da cuntinuà issi cuntatti oramai tenuti è praticati...