Antone : - Mi sente u spinu, mi sentenu l'anche è e mo spalle... ùn le sentu più !
Ziu Simone : - O l'omi di oghje : site scrizzule !
Ghjuvan Paulu : - È eiu, aghju un schjentu à rombu di corre per isse machje ! È i mo pedi ùn sò chè una ferita.
Ziu Simone : - Ma chì credi : u cignale, soca deve aspettà i to comudi?
Lucia : - Merà, o zì, hà e so mani è a faccia sgranfiate, a camisgia è i pantaloni strappati !
Antone : - O quanti pruni ! quanti lamaghjoni ! Corgu, cascu, mi arrizzu è cascu dinò. Quattru volte mi sò lampatu !
Lucia : - Ma in fin di contu, chì ci purtate ? chì avete ? chì arricate ?
Antone : - Scusa, un ochju mezu chjosu, un pede stortu, è una ... bella stizza contru à tè !
Lucia : - Vai puru, ne vale ancu a pena à cuntà nant'à i nostri cacciatori !
Ghjuvan Paulu : - Hè colpa toia : à u mumentu di tirà, mettu a manu à a cartuccera : micca cartucci ?
Lucia : - Colpa meia ! Ti ringraziu ! dite la puru : site cacciatori à trè colpi !
Antone : - Ùn face nunda. Dumenica chì vene, mi ne occupu eiu di u materiale !
Vincenzu Mariotti : - Allora simu freschi. L'animali a si ponu puru passighjà tranquilli per issi boschi.
Antone : - È bè innò ! site gattive lingue tremindui ! Eccu a nostra caccighjata !
Ghjuvan Paulu : - Sei culombi, duie lefre tamante è una manata di funghi per u cundime !
Lucia : - Curciarelli ! Per contu meiu, ùn ne manghju !
Antone : - D'accordu ! è bè ti dicu cum'è quellu : " Asciuva ti ne a bocca : ùn ti ne tocca ! "