Ragiunata
A Corsica in u Mediterraniu
![](https://interromania.com/sites/default/files/styles/image_548xx/public/14_01z_corsica_mediterraniu_image001.gif?itok=Psq4Cf5d)
A Corsica in u Mediterraniu
Eserciziu : Avà stà à sente u titulu è ripete u titulu
Stà à sente una volta l’inseme di u testu lighjendu lu
(Ecouter et lire des yeux tout le texte)
A Corsica face parte di l’isule più grande di u Mediterraniu. Ma di pettu à e so surelle maiò cum’è a Sicilia, a Sardegna o Cipra hè assai menu pupulata, forse per via di u so carattaru geugraficu assai muntagnosu.
Da isula, ùn hè tantu penalizata da e distanze cù a « terra ferma ». Hè situata in u Golfu di Genuva è a custera taliana li vene solu à centu chilometri. Chì osinnò, l’isula si gode un locu à bastanza centrale in u « Mare nostrum », ciò chì spieca e diverse influenze culturale è linguistiche durante a so storia marcata da invasione multiplice è da ogni latitudine.
A storia di l’ultimu millenniu hè corsa principalamente da trè tempi : u tempu pisanu, quellu genuvese è infine francese. Ma da l’Antiquità à u Medievu, l’isula cunnosce i Grechi, i Rumani o i Sarracini, per indettu. Di sicuru, tutti sti passeghji ùn stanu micca senza lascià una stampa culturale è architetturale chì mette propiu a Corsica à u centru di u Mediterraniu.
Culturalamente, hè cunsiderata Mediterrania Occidentale. A lingua corsa, per indettu, face parte di l’aghja italo-rumanza. A lingua, elemente centrale di l’identità affirmata di l’isula, face parte di l’emergenza rumanza chì pone in giru à e rive nord di u Mediterraniu l’inseme di e lingue di matrice latina (più maiò o più chjuche) chì noi cunniscimu oghje. In u frattempu, u corsu si farà unu cù e diverse influenze, e principale essendu quella tuscana poi, da dui seculi, quella di u francese.
Al di là di sti particulari, a mediterraneità di a Corsica si ritrova in parechji altri criterii. Carattari genetichi, valori è raportu à l’altru, cucina, panni, usi cumunitarii è religiosità. Oghje, malgradu un’occidentalizazione forte à livellu di l’evuluzione glubale, a nova immigrazione inserisce torna l’isula in u Mediterraniu sud postu chì a Corsica accoglie cumunità magrebine è purtughese impurtante.