Presentazione Imparà u Corsu

Versione :
Corsu
Francese

IMPARÀ U CORSU
Vulete parlà a lingua corsa ?

U STUVIGLIU

IMPARÀ U CORSU hè un stuvigliu da imparà u corsu. À l'ingrossu currisponde à u livellu A di u Quatru Eurupeu di Riferenza di e Lingue (CECRL).

IMPARÀ U CORSU, arnese autonumu è evulutivu (1), appronta dinù l'aduprà di u Metudu INCORSU (livellu B) è INCORSU + (livellu C)

IMPARÀ U CORSU hè per tutti quelli chì volenu piglià cuntattu cù a lingua corsa, solu pè accustà la o acquistà ne qualcusella è forse imparà ne di più.

(1) Si prevede di curà è mette à ghjornu u cuntenutu è a struttura di funziunamentu.

ACCESSU

Ci si entre da www.interromania.com

Sceglie a rubrica IMPARÀ U CORSU

L'accessu hè di gratisi.

Si'ella casca, in i mesi chì venenusi hà da pudè fà un prugrama d'imparera à distanza (cun coaching di gruppu). Tandu si dumanderia una cutizazione pè issu serviziu in più.

LIVELLU DI LINGUA

Ùn si cerca micca un livellu altu, ideale di lingua, ma u parlà di tutti i ghjorni. A mira hè pedagogica è cuncreta. Da un'altra parte si sà chì IMPARÀ U CORSU, s'ellu ci vole, si hà da pudè cumplettà, arrichisce currege è diversificatu.

In e varie rubriche è stonde d'imparera quelli chì parlau ùn sò micca tercani di a parolla, ma spessu spessu giovani è, propiu à posta, avemu vulsutu fà sente sente ghjente chì scumbatte à rifinisce a so spressione persunale in lingua corsa.

Si hè circatu à fà sente a lingua di tutti i ghjorni, ma a manera di dì vole porghje à quellu chì impara l'articulazione di e parolle è di l'infrasate in modu più chjaru pussibule. Tandu si capisce chì cù IMPARÀ U CORSU si cerca à porghje un modu praticu è cuncretu di sprime si in corsu, imparendu a lingua da per sè, è in particulare ripetendu ciò ch'omu sente.

Si hà da sente, in e parolle è e frase, chì a manera di dì cambia à le volte da una à l'altra di e voce. Issa variazione và cù a scelta « pulinomica » (2) di u corsu.

(1) A pulinumia posa nantu à a presa in cunsiderazione di a variazione linguistica è dinù a tuleranza in quantu à a variazione interna di a lingua in quistione.

CUNTENUTU

Sò 20 sequenze à presentà :

  1. Una Ragiunata in basa à ogni sequenza
  2. Elementi di vucabulariu utile
  3. Elementi gramaticali assestati in modu prugressivu
  4. Esercizii da migliurà a capiscitura di a lingua
  5. Esercizii di ripetizione (rifà versature currente è spressione à pruverbiu)
  6. Esercizii arrimbati nantu à l'ascoltu di canti

Pè u più, issi cuntenuti sò orti ancu in versione francese

ANDATURA PÈ IMPARÀ

Secondu ciò chì cunvene ad ognunu (vuluntà di acquistà l'elementi di a lingua, curiusità è basta, voglia di imparà in modu prugressivu, cunsultazione regulare o à stonde) tuttognunu pò affaccà si à aduprà IMPARÀ U CORSU :

  • Longu à e 20 sequenze una à pressu à l'altra (sò incluse ripetizione è esercizii chì rivenenu)
  • Scigliendu rubriche trasversale (es : tutti i dialoghi, tutti i verbi, elementi gramaticali, tutti l'esercizii)