In u centru di a Corsica ci hè Corti. Si cunnosce a cità per via di a so citadella è dinù a so università.  Corti hè nantu à u stradone chì colla in Aiacciu da Bastia o fala da Bastia in Aiacciu secondu cum’ella dice a ghjente. Si và faciule da Corti sinu à a più parte di e pieve di l’isula: Aiacciu è Bastia, Aleria in Piaghja orientale, a Balagna è a regione di Portu franchendu a bocca di Verghju. Ci hè dinù u trenu per Bastia, Aiacciu è Calvi.

A Citadella di Corti
Hè stata custruita in u 1411 da u vicerè Vincentellu d'Istria è dopu i Genuvesi l’anu allargata, è po i Francesi in tempi di Luigi XV dopu à Pontenovu. Stà in altu nantu à un pentone  sopra à A Restonica è U Tavignani.

L’università è a cità
Pasquale Paoli, u « babbu di a Nazione Corsa » l’hà fundata in u XVIIIu è po hè stata chjosa dopu a cunquesta francesa durante dui seculi. Hè turnata à apre in u 1981. Oghje ci sò 4500 studianti spartuti in trè poli : 1) scenze è tecnulugia 2) dirittu è scenze ecunomiche 3) lettere è scenze umane.

Passighjendu
A strada principale, u Corsu Paoli, apre à un puntu è l’altru nantu à duie piazze : in cima a Piazza cù a statula di u Generale di a Nazione Pasquale Paoli, è da l’altra parte, nantu à a Piazza Padua, a statula  di u generale Arrighi de Casanova, Duca di Padua.
Vicinu à a Citadella, in piazza Gaffori ci hè a statula di Ghjuvan Petru Gaffori, capu di i patriotti corsi è a chjesa A Nunziata. Vicinu à u museu, un belvedere sbocca nantu à vista nant’à Restonica è Tavignani.

Corti è a muntagna
Corti ùn hè tantu in altura : 450 metri. È puru li cunvene à quellu chì li piace à attippà per via ch’ellu ci hè, à vicinu, parechji puntali è in particulare U Monte Rutondu cù i so 2622 m.

Museu d’antrupulugia
U Museu di a Corsica offre una spechjata di a sucetà corsa d’eri è oghje, cù e so permanenze è i so cambiamenti, a so musica è e so arte tradiziunale. Mostre tempurarie è varii avvenimenti venenu à cumplettà un prugrama riccu d’animazione culturale.