U GHJACARU CHÌ SI CAMBIA IN DIAVULI

Agustu si ni vultaia à mezanotti in Livia dopu avè affistitu San Ghjuvanni in Poghju, paesi vicinu, u ghjornu di a festa patrunali.

Tuttu marchjendu, si n’avvedi chì u so ghjacaru Pidiolu s’ingunfiaia di più in più, è in un mumentu hà presu a forma di un cristianu !

Agustu, impauritu, si dumandò ciò chì accadia, ma avia u so fucili in casu di bisognu.

-« Quali sè, è chì voli ? Sarii micca l’anima di qualchì mortu di u Campu santu quì vicinu ? »

L’omu ùn dici nudda ma piglia un bastonu è si metti à culpà Agustu chì si daia à i brioni.

Si lent’à corra versu u paesi ma quiddu, chì era da veru u Diavuli, curria anch’eddu è ùn facia chè minà ancu più forti.

U risultatu: Bracciu è ghjamba tronchi, u capu insanguinatu, è di u fucili ùn ni firmaia chè un pezzu di l’incasciu !

Di grazia scontrani u Preti Antunareddu chì purtava l’oliu santu à Dumenicu Castidari chì era à l’ultima.

Hà capitu subitu è s’hè missu à intruscià lu d’acqua biniditta.

-« Ti ricunnoscu ! Tù sarii u Diavuli ! Chì veni à fà quì ? Volta subitu in infernu ! »

Ogni goccia d’acqua biniditta mantagava u Diavuli chì ùn facia chè ghjastimà. À la fini, hè sparitu sottu terra.

Agustu n’hè fermu mesi è mesi malatu, sciancu, è pà mumenti pirdia ancu u ciarbeddu.

Ùn hà varitu bè che l’annu dopu, u stessu ghjornu di a festa di Poghju, pà San Ghjuvanni.

Mà tandu si n’hè vultatu in Livia di ghjornu, u lindumani. Una volta basta!

Quant’à Pidiolu, eccu un ghjacaru chì nimu ùn hà più mai vistu !