SAN MARTINU È U DIAVULI

 

Sò tanti seculi è po seculi, u diavuli era patronu di a maghjor parti di a pianura di u Taravu.

Un ghjornu, u Diavuli Satanassu s’era fattu buiaghju è rumpia un chjosu incù i so boii,  cantendu à voci rivolta  a canzona di u buiaghju :

 

Or’ aiò li me  culombi

O li me pedi purcini

I me pecur’à campana

Ghjiretimi l’aghja in tondu

Chì l’emu da cunsumani

Ch’hà da ghjunghja San martinu

Cun la pala è lu bacinu

È ci avemu da metta à pulà

N’em’a fà centu mizzini

‘Ncù’na soma n’avantaghju

Pà i povar’andataghi !

 

  San Martinu l’hà vistu, intesu , è si hè dittu :

-«  Trè mè mè, pensu chì Satanas faria megliu di parta dà quì, chì ni devi fà

        à pedi è à cavaddu ! »

 

-«  Chì faci quì in issa pianura, bruttu  scumunicatu ? »

-« Chì ti pò fà,  pass’a to strada è lacami a paci ! »

-« Ti vogliu fà scappà da quì, è po basta. Alè, c’u ghjaddi ! »

-« Quì socu ind’è mè, u chjosu hè u meiu  è mancu Diu ùn mi pò caccià ! »

 

Ani batalatu un’ora in quà è à u più forti di a baruffa, a fumara di u cuncediu hà minatu nant’à una petra è s’hè tronca !

 

-« Ah ah ! A’ vistu si Diù ùn ti pò caccià ! Lavora tù avà  s’è tù sè bonu ! »

 

Satanassu diventa scatinatu ! Da u so nasu sortini fiari è accenditi !

Una stazona è u so suffiettu sortini di terra,  è u diavuli si metti à batta un farru caldu pà fà un’altra fumara pà u cuncediu.

Ma ùn ci hè pussutu ghjunghja.

 

Allora s’hè missu à fà un marteddu cusi maiò maiò chì avia vai à pisà lu !

Da u suffiettu ni sorti un ventu scatinatu è u farru diventa più chè rossu !

U diavuli vulia in tutt’i conti arranghjà a so fumara, è pichja chì ti pichja, ma nudd’à fà!

 

 

È San Martinu chì ridia pà di sottu in a so barba:

-“Allora, o Satanà,  ci ghjunghjarè à rompa u to chjosu?”

 

Quandu troppu hè troppu! Ammutulitu di rabbia, u Diavuli hà persu a partita! Allora inttopa’ u martiddonu è u lampa versu u Monti Barbatu. U marteddu piglia forza è d’un colpu mena u monti,  li faci tamantu tafonu  di parti in parti, è finisci pà cascà sott’à Ulmetu !

 

Prima di vultà in infernu una volta pà sempri,  Satanassu volsi staccà i boi di a coppia,  ma ùn ci hè ghjuntu : i boi erani impitrati !

 

San martinu, eddu,  hè sparitu di a pianura di u Taravu  è à i ghjorni d’oghji, ùn s’hè mai più vistu.