SPASSIGHJATE LITERARIE: “GHJUVANNI L’ARIMITU”

GHJUVANNI L’ARIMITU

 

U bon Ghjuvanni, un sant’omu, ùn pudià più suppurtà a vita mischina di u paesi è tanta ghjilusia, numicizia, cattivisimu è altri beddi cosi.

Un ghjornu hà dicisu d’andà si ni in fondu di a furesta pà campà solu comu un arimitu in una sapara prufonda.

Sempri in prighera, era divintatu magru com’un chjodu, chì si vidiani i so ossi ! 

Purtantu ùn mancava di nudda chì i paisani li purtaiani da manghjà à vulintà, è a sapara era piena di pruvisti.

Uni pochi di latroni chì a sapiani ani pensu ch’u megliu era di piglià tutta issa roba ch’ùn pudia serva à nimu.

Ben’intesu, senza fà mali d’alcuna manera à u sant’omu. Ma com’ùn surtia mai di a sapara, ci vulia à truvà comu fà !

Carchi di sturmenti musicali, chitarr’è mandulini, cetara è viulini, si mettini  davant’à l’intrata di a sapara à ghjucà è cantà à voce rivolta :

Ghjuvanni,  u bon Ghjesù   hà dittu : -« Caru Ghjuvanni, aghju intesu i to prigheri ! Ghjetta tuttu fora, manghjuscula è panni, po codda quì incù mecu. »

Issa bedda musica, issi beddi voci ùn poni vena chè da u celi! Ghjuvanni ùn faci nè una nè duì, ghjetta tuttu fora allora ch’un latronu, à misura , si purtava tuttu più luntanu.

Tandu i latroni musicanti, morti di a risa si mettini à cantà :

 -« Ghjuvanni,  u bon Ghjesù   hà dittu : -« Caru Ghjuvanni, metti ti nudu è badda a manfarina. Dopu codda quì incù mecu. «

-«  Eccu una dumanda chì mi pari più chè strana ! Sara pà veda s’e facciu ciò chì hè dumandatu quassù ! Ma si Ghjesù a voli, femu cusì ! »

 

È u nostru arimitu ghjetta fora tutt’i so panni è si metti à baddà ! I latri, chì avianu presu ciò ch’eddi vuliani, si nì vani ridendu è scaccanendu.

Badda è badda, ori è ori, ma anghjuli di u celi ùn ni falava pà purtà à Ghjuvanni in paradisu ! Stancu persu, volta in a sapara, si sdraga nant’à una panca è s’addurmenta.

Si sveghja u lindumani famitu è bè, ma ùn c’era più nudda à manghjà !  Di più era nudu in Cristu !

Comu fà pà andà à buscà qualcosa in issa tinuta ? Ma dopu avè riflessu s’hè dittu chì di tutta manera, ci vulia à andà, chi nimu ùn  faria attinzioni à un omu vechju è dissuchjulatu ?

 

Ghjuvanni si dà di curaghju è nì parti. In furesta scontra una ghjuvanetta chì si mett’à fughja briunendu,videndu lu cusì !

-« Mì mì chì facciu sempri impressa ! Ci vole ch’e mì trovi un vistitu ! »

Un pocu più luntanu, vedi una donna chì anch’edda scappa come se avissi vistu u diavuli !

Ùn firmava più chè d’ arrubà una panna missa à siccà nant’à qualchì  machjonu.

Ghjustu, casca bè chì daret’à un murettu, un linzolu biancu battia à u ventu ! Subitu, u si mett’adossu è cusì pudarà andà in paesi à buscà si dà manghjà.

 

Ma u linzolu avia un patronu. Quiddu si lampa à daretu à Ghjuvanni, briunendu pà fà attraghja a ghjenti. Hè cusì ch’eddi l’arristetini è u mettini in prighjò.

Era senza cuntà nant’à i paisani chì ani fattu di mani è di pedi pà fà lu libarà, chì era un sant’omu chì hà pussutu spiigà parchì  s’era truvatu in issa situazioni strana.

Una volta libaru, l’ani vistutu com’un Principu è dopu si n’hè vultatu in a so sapara carcu di pruvisti.

I latroni ani pensu chì c’era dinò qualcosa à buscà  è sò ghjunti una mani di bon’ora, sempri incù sturmenti di musica è canzoni :

Ghjuvanni Ghjuvanni, Signor Ghjesù  hà dittu-« Caru Ghjuvanni, aghju intesu i to prigheri !  Ghjetta tuttu fora, manghjuscula è panni, è po codda quì incù mecu. »

Ma Ghjuvanni hà pinsatu chì l’anghjuli chì cantavani, ùn si sà chì l’hà mandati, è di sicuru micca Ghjesù ! Allora s’hè missu anch’eddu à cantà :

Anghjulini , bedd’Anghjulini, diciareti di a me parti à Signor Ghjesù ch’ingannat’una volta, ùn mi ingannarà micca dui. »

I latroni ani capitu ch’ùn c’era più nudda à buscà in a sapara di Ghjuvanni l’arimitu, è ch’edd’era megliu d’andà in altrò à ingannà unu è l’altru.

 

Da tandu, Ghjuvanni hà pussutu finiscia in paci i so ghjorni.