Ci era una volta, in un paese persu di Castagniccia, una famiglia chì campava felice è alegra. Eramu d'estate, quella matina facia un caldu tremendu è Rosa, a mamma, ne apprufittò per caccià e linzole ch'ella avia stesu a viciglia. Solu chì, ghjunta quallà, u stenditoghju era viotu. Ùn firmava mancu più un asciogna. Inzergata ma micca stunata, Rosa chjamò i figlioli :

• « Antone è Ghjuvanna ! Venite quì ! S’è vo avete pigliatu torna e linzole pè fà vi un vestitu di carnavale v'aghju da minà ! »

Sentendu à mamma bruntulà, affacconu subitu subitu.

• « O Mà, a ti ghjurgu, ùn avemu pigliatu nunda ! » Disse Ghjuvanna.
• « Hè vera ! Eramu ind’è zia Michela à coglie chjarasge ! » Aghjustò Antone.
• « Ùn serà micca una curnachja chì si serà arrubata i panni ! Vi lasciu trè ghjorni cuntendu oghje pè vultà cù e lenzole! »

U tempu di dì la, a mamma si n'andò in casa, cuntinuendu à bruntulà.

• « O Antò ! Ch'avemu da fà ! Per una volta ùn avemu fattu nunda ! »
• « A sò o Ghjuvà ! Ma ci vole à fà qualcosa è ci tocca à ritruvà i panni osinnò l'affare hà da batte male pè noi... Ma... Quantunque ci hè qualcosa di stranu, un'inchiesta s'impone ! »

•  « Hè detta ! »

Si misenu à circà indizii in giru à u stenditoghju. Ma passò u tempu..., u ghjornu sanu... U solu indiziu ch'elli avianu trovu era qualchì capellu grisgiu. Ùn ne pudianu più, eranu stanchi morti, andonu  à chjinà si è ripiglionu l'inchiesta u lindimane.

• « O Antò ! Quantunque, ùn seranu micca i capelli di un mostru ? »
• « Avà ! A to tuntia, un mostru ! »
• « Bò... Ma... Forse una strega... »
• « Aiò, Aiò, zitta ! Vogliu dorme ! »
• « Va bè, à bona notte. »

À l'alba,  turnonu à circà, fendu u giru di u paese, fighjulendu in ogni scornu, ogni piazza, ma senza truvà nunda. À un mumentu datu, sentinu mughjà à prete Andria.

• « Aiutu ! Aiutu ! M'anu arrubutu a mo suttana ! Senza què, ùn possu dì a messa sta dumenicata ! »
• « Aaaah cara ! Disse Antò à l'appiattu, cuntentu cum'è un puchjinu.
• « Aiò o Antò ! Sì scemu, ci vole à aiutà lu osinnò avemu da finisce in infernu ! È sò sicura ch'ella ci hè una leia cù a nostr'inchiesta !
• « Ai a raghjò o Ghjuvà... Andemu à vede. »

Cullonu fin'à a chjesa à visticà. Infatti, c’eranu torna issi capelli grisgi è un mandile puzzulente è ricamatu cù a lettera « C ».

• « Aiò ! Ùn tuccà micca què chì a to manu s'hà da infracicà ! »
• « Pianta ! A sò di quale hè issu mandilacciu, hè quellu di Catalì a vechja scema cù tutti i so misgi ! »
• « Ai a raghjò ! Ai  a raghjò ! Andemu ci ! Disse Ghjuvanna.

Ghjunti quallà, piatti daretu à i sepali fighjonu a vechja. Benintesu chì era ella ch'avia arrubati e linzole è a suttana.

• « Guardà mi sta sciocca ! Cù e linzole di mamma hà fattu un vestitu per i misgi è ella s'hè messa a suttana di u prete ! »
• « O Antò, ùn ai capitu? Vole marità i so misgi ! Andemu à chjamà à mamma è à prete Andria ! »
• « Iè andemu ci, è cusì ùn ci piglieremu micca una concia da mamma ! »

Sabrina CRISCITTIELLO LCC3