Dumani hè l’apartura di a caccia. Pà una volta, vogliu andà anch’eiu.

Mi riven’à menti, quand’erami ziteddi, à puntà di mani, tuttu issi rimisci è parapiglia di ghjacari tinuti strinti (inc’una funi capruna) pà i cacciadori armati di « faucho », runcati di sameri imbastiati pà pudè cunturrà i cignali chì sariani tombi.

I ghjacari parini ancu più impacinziati chè i cacciadori, è tirani à strappera nant’à a funi :

“Aiò,o Bruscu, ch’è tù tu brusgi à legnu verdu, » li lampava Zì Francescu !

È noi, i ziteddi, ci dumandavamu ciò chì si pudia passà in issa caccia, pà essa cusì bramata :

- « O mà, vulariu andà anch’eiu à caccia à u cignali ! »

- « Ùn hè fattu da ziteddi ! aspittarè d’essa un omu ! »

Allora aspittaraghju !

Dopu sò andatu pà issi cuntinenti à buscà mi travagliu è pani.

Ma comu a cantava l’amicu Ciosi :

«  In terra cuntinentale

Nun ci aghju signatu patti

È s’e campu, o Cursichella

Spergu di ghjunghj’à truvà ti … »

Allora, essendu ghjuntu, andaraghju anch’eiu à u cignali ! È cusì, purfini, aghju da sapè comu si passa !

Ma à mè, ùn mi piàci di tumbà nè ghjenti nè animali. Allora andaraghju senza fucili, pà fà i voci, pà a cumpagnia, l’amicizia, ma dinò pà u spuntinu…. È chì spuntinu ! Ùn vi ni dicu nudda !

Ghjornu d’apartura di a caccia à u cignali , Bocca di Sant’Ustasgiu. A me prima caccia...

Dunqua ben intesu, una notte di sogni induva si mischianu cignali tamanti à elefanti, corsi à daretu da lioni … tuttu què pà bràma.

Cinqu’ori. Faci sempri notti, ma u celi chjaru spampigliuleghja à u livanti. U ghjornu ùn tardarà micca à pisà si.

A ghjurnata prumetti d’essa calda ma à 1200m d’altitudina u frescu di a notti chì compii dumanda di fascià si.

Cinqui vitturi nant’à u bordu di u stradonu. Solidi, parchì utuli pà purtà i cignali morti. Lumeri in fronti, l’ordini di parte hè datu pà un capimossa.

Deci omini s’incrochjani nant’à u strettu camminu chì codda in freccia pà a facciata à livantu di a muntagna, cuparta di un spessu mantu di pini larici,  imuli à maghji di battelli. I ghjacari, senza pacenzia, tirani nant’à so funi, à u puntu di aiutà i cacciadori à cuddà.

Dopu à una mez’ora di cuddera chì metti i musculi sempri freti à l’adisperu, una prima punta, limita di a machja, hè in vista.

U ghjornu spunta u so lumu è si pò spigna i lumeri. Drittu davanti, si succedini punti nudi ch’è no divaremu francà una appressu l’altra, fin’à a punta di u monti San Petru, u più altu. A vista si stendi à l’infinita, di i dui parti di a muntagna.

À manca, u Cuscionu è i so prati fiuriti, è po a dantella di i punti di Bavedda, alti cime dighjà illuminati di soli. A vista si stendi fin’à Bonifaziu...

À dritta, tutt’a vaddi di u Taravu , da i piaghji di u Valincu fin’à bocca di Verdi, culà, à u livantu. À davanti à noi, Aghjacciu, u mari…. à perdita di vista.

L’omini ùn sò mai domi d’issu spitaculu mille volti vistu. L’aria pura di l’alturi, l’odori di maredda, d’arba barona, di ghjinneparu… imbriacanu.

Ma bisogna à marchjà. Si codda è si fàla cresta cresta, ma u caldu si faci sente. Eccu a punta di San Petru, duva si trovani munimenti chì ramentani l’accidenti aeru di 1981 incù 178 morti.

Quì si pò veda dinò una copia achjuculita è in farru di a ghjesgia di Bicchisgià, chè l’amicu Marcu Tafanelli hà fattu di i so mani, d’un pesu di centu chilò.

Drentu sò stati missi tutti l’articuli è documenti chì anu trattatu di l’accidenti, tradutti in parechji lingui.

Petru Maria, u capimossa, teni un ultimu discorsu fattu di cunsigli di sicurità, è po i trè ghjacari, solidi Cursini nati pà issi lochi, sò purtati pà un cacciadori, chì metti à capu inghjò da a parti punenti di a muntagna, fin’à un vadellu pienu à lamaghjoni.

Avà, i cignali sò à u riposu, prutetti da i lamaghjunici è a filetta pagna..

L’altri cacciadori si sparghjinu longu à a cresta di manera à chjudda i passaghji presi pà i bestii chì fughjinu davanti à i ghjacari, lintati dopu à un colpu di zifuleddu di u capimossa.

Un longu silenziu, è po si senti abbaghjà i ghjacari. Socu quì, vicinu à Petru, incù a me sola arma: un strumentu di fotografia.

- « I ghjacari corrini. I cignali fughjini davanti. » dissi Petru.

-« Comu a pò sapè ? «  dicu.

Petru mi fighjula, un ditu nant’ à i labbri chì vole dì : Zittu mì!

L’abbaghji continui cambianu di sonu, « Uuaaaa.. » è po si tacini. Chì succedi ? L’abbaghji ripigliani ma di manera diffarenti « Uuap, uuap… » senza tace. :

-« Avà u cignali hè « rimissu » ! Vole dì chì un ghjacaru u teni in rispettu ! »

-« Ma comu a sà ? «

- « O scemu, pà via di a manera d’abbaghjà !!infine !! Aiò!!… 

Vengu d’imparà qualcosa !! 

 

Nuvellu colpu di zifuleddu: l’abbaghjumu ripiglia comu a prima volta, i cignali torrani à fughja è Petru s’appronta, apri u so « drilling », metti una cartuccia à badda, mi cumanda di tena prontu u me strumentu fotograficu, è feci signu di croci, come pà dì : « Forza u porcu vinarà pà quì versu mè !» !

Ma in fatti, dui colpi ribombani culà bè in bassu in a pianura, ciò chì voli dì chì pà issa volta , un altru cacciadori hà avutu più furtuna chè Petru.

« Sarà pà a prossima volta, o Pè. » !

Tutta a matinata, si succedini lintati di ghjacari, colpi di fucili è cetera… fin’à u spuntinu prumissu, chì vali d’esse cuntatu solu…..  a prossima volta !