GHJUVAN LUIGI MORACCHINI

U primu scrittu publicatu di Ghjuvan Luigi MORACCHINI, ghjuntu à a scrittura dopu à u 1975 fù « U Cipressu », stampatu ind’è Kyrn di ferraghju 1977. U primu mumentu diviziosu di scrittura di issu giovanu di Vintisari fù trà 18 è 20 anni. Un periudu zeppu di creatività, cù a pratica di tecniche audiuvisive è dinù testi puetiehi cantati da E Duie Patrizie, stalvatoghji satirichi è raconti ch'ellu cuntava in e serate di Scola Corsa.

In issu primu periudu, u caratteru literariu chì spicca hè quellu di un prusatore di testi spessu fantastichi è simbolichi, arradicati propiu in a cultura tradiziunale è fendu vede, al di là di l’usi nustrali, l’umana dimensione tutta. Da 1'annu 1980 hà intraprese in Nizza è Parigi una furmazione cumpletta in pedagugia è ne hà fattu u so mistieru in l'Educazione Naziunale in Corsica. Dopu à un'altra affaccata in u campu di a nuvella (cuncorsu « Misteri da impennà », 1988) è un altru periudu senza publicà, hè turnatu in u campu di a scrittura è ci hà datu da leghje unepochi raconti duve tradizione, innuvazione è l’estru di una ricerca di scrivitura persunale move sempre creazione nova. L’ambienti ch’ellu face affaccà tandu mette sempre in ballu tendenze di una visione chì sbuccaria addisperu. Ma quessu ferma sintimu puntuale chì un’irunia fattiva ghjunghje –sempre sempre- à tuppà issa via, insignendu e strade narrative di l’umanu chì dura è face chjassu.... A ci dice a so pruduzzione da tandu (cf.edizione ALBIANA-CCU pè u più: https://www.albiana.fr/auteurs/1037-moracchini-ghjuvan-luigi

 

A BASTIA DI Ghjuvan Luigi Moracchini (1980-2010)

 

U Racontu senza titulu di G.L.Moracchini dice cum’ella muta visu a cità segondu l’estru di u scrittore, l’ambiente di ciò ch’ellu mette in scena è -pò dà si- certe esigenze di u generu ch’ellu maneghja.

Sò trè manuscritti, scritti trà 1980 è 1983, chì compienu un primu periudu di scrittura chì si era pè u più datu à sfruttà u tema di u mazzerisimu. Palesanu una primura nova ind’è l’imaginariu di u giovanu scrittore chì, dopu, anderà di più à cullucà i so libri in ambienti urbanizati è isturicizati. À prima vista si puderia un cambiamentu forte di l’ispirazione ma s’omu cerca più fondu spicca a permanenza più chè u cambià. Di fatti da l’ambiente rurale à u citadinu, cunfine da francà, ùn ci ne hè statu mancu à pena in a struttura prufonda di u linguaghju literaria.

A meditazione in quantu à a vita supranata da un determinisimu pocu quentu è angusciosu averà cambiatu vestura, ma pelle micca. Hè interessante, senza altra cunsiderazione spiicativa, à custattà u dissegnu, a forma è i nomi di a cità cum’elli affaccanu è smarriscenu, voltanu una cria è spariscenu à fattu da una versione à l’altra.

 

L’impressione generale hè chì da Nizza à Bastia, cun quella arretta in Palerma, Venezia o altra, u racontu si arradicheghja o si scuntestualizeghja, à misura ch’ellu si face più sobriu l’estru narrativu è chì a dicitura stringhje di più in più un ambiente metafisicu o neru. Issi ghjochi di affacca è smarrisci di a cità cù u so nome è i so tratti distintivi sò significativi di una scrivitura chì cerca u so chjassu rente à a cunfine trà duie rapresentazione literarie di a cità.

Una, per cusì dì tradiziunale, duve u locu citadinu hè in a cuntinuazione di un paisaghju culturale unitu è senza rumpitura da muntagna à orlu di mare: a storia ci si trova pocu è micca o allora piglia l’apparenza di una sedimentazione di tempi riprudutti listessi. Aiacciu, Bastia è altre sò paesi è spazii cumunutarii. In e literature minore l’estru hè spessu descrittivu è a storia cuntata rimemurazione nustalgica di un passatu cullettivu. Solu i scrittori d’ingeniu, puru scrivendu in un filu è cun l’estru dettu tradiziunale, trovanu a strada ghjusta chì si lascia attraversà da chjame varie è spessu cuntradittorie. È ancu pè ùn esse muderni muderni, sanu percepì è dì un ambiente citadinu mudernistu. Dalzeto hè statu di quessi: ùn ci hè chè da sente ind’è ste pagine ciò ch’ellu ispira à Orlando Furioso chì messe in scena un Pesciu Anguilla chì mosse à Bastia sana sana pochi mesi fà.

L’altra figura literaria, accertata in relazione cù l’entre di a cità in a visione literaria cum’ella si definisce quessa à l’ingrossu da 150 anni. Una manera di scrive è di cuntà chì lampa incertezza, discuntinuità è straneità à mezu à a vita di l’omi. L’abitanti chì si movenu in a cità sò rimandati unu à unu à a so identità singulare –è pè u più sulitare.  A storia di e sucetà ci si leghje à ogni passu, è porta più u segnu di ideulugie è lege marcante chì reificheghjanu a ghjente.

In isse cundizione, l’incertezza di l’autore giovanu pare significativa di una scrittura sensibule, intelligente è stimulata da e vie parechje duv’ella si pò indià.

 

Trenta anni dopu, ind’è u rumanzu ch’ellu hà publicatu, N’aghju da empia u campusantu, face affaccà dinù à u primu postu u nome è e carattaristiche di Bastia. Bastia volta ad esse u teatru di a storia. Teatru? Si pò dì ancu persunagiu è attore, mutore di a fizzione è causa di u drama messu in scena.

 

Hè chjara chì per Moracchini u centru di a vita bastiaccia, quellu chì conta in veru, hè –o hè statu- u Mercatu. Oghje hè diventatu un locu neutru, viotu o –hè listessa- invasu da schiere cuntinue di turisti, è d’altronde spazzatu da un ventu chì ci strughje ogni segnu di vita cullettiva. Ùn hè più un locu di scontri, di cunvivialità autentica. Infatti, ci vede ellu u schelatru di a Bastia vera. In quantu à u portu, apre nantu à nunda. U portu hè chjusura. U mare chjode a vita citadina è li caccia sensu. U mare hè chjusura, chì ùn sà purtà chè invasione turistiche mercantile, o sbuffulate di ventu murtiferu. Bastia hè cità di ventu. Hè cità di morte.

A deambulazione di i persunagi chì tessenu a storia di u libru si cerca un agrottu in u bughju di a notte. A cità hè sulare, ma di sole artifiziale cun lumi è pruiettori in ogni locu. U lume chì neca a vita. Bastia hè cità viota. Paradossu s’omu tene contu chì Moracchini, da insignà cum’elli si movenu i so persunagi, seguita a guida culturale Promenade dans Bastia. Altru paradossu di a custruzzione rumanzesca: l’autore stima chì a so storia ùn hà bisognu di un locu tipicu. Bastia è Fantastica bar o o Nizza è Caffè Riche  -quelli di u Racontu senza titulu- pocu impreme. A fizzione hà bisognu di u locu attu à fà nasce u drama è à inghjennà l’inchiesta pulizzera. Bastia cum’ellu a custruisce hè cusì è a realità conta pocu.

A cuncezzione ch’ellu move và oramai appaghjata strettu strettu cù a visione mudernista di i raporti trà literatura è cità. U spaziu urbanu hè di fatti cunfusione è anunimatu, squassà di i valori è usi cumuni è incalcu di a stampa individualistica di a vita umana. Ne nasce un’inchietitudine fundamentale chì mette a so tunalità –slaziu, indiferenza, angoscia, tristizia zeppa è ancu addisperu- ind’è l’ambienti, i gesti, e parolle, i sintimenti è i pensà. Simbulicamente u libru mette vita in u quartieru di U Fangu è face di issa margine u centru novu di una vita cambiata in tuttu duve tuttognunu hà un campà anonimu è uniforme, listessu à quellu di ogni cità, duminata da ritimi è pruspettive dipendenti di e serie televisive.

 

Ghjuvan Luigi MORACCHINI : un’opera ancu à compie...

 

Dapoi l’anni 1980 si hè pisata una leva nova di scrittori in lingua corsa chì i più vechji oghje quaranta anni ùn l’anu ancu. Arricurdemu ci quelli chì sì eranu aggruppati ind’è a rivista Cismonte diretta è purtata da Michela Curina Bartolini è i so amichi studianti in Corti chì ùn anu cappiatu l’indiatura culturale. 

In u periudu ghjustu nanzu soca sarà Ghjuvan Luigi Moracchini quellu chì hà scrittu di più in prosa. U so primu scrittu publicatu hè statu ind’è Kyrn (« U Cipressu », ferraghju 1977) è fece tamanta impressione. Natu in Vintisari, Ghjuvan Luigi ùn hà ancu diciottu anni quand’ellu face cunnosce issu racontu fantasticu, foscu senza addisperu, crudele senza cinisimu. L’evucazione di un zitellu abbandunatu da a vita è chì si vindicheghja cum’ellu pò : simbulicamente.

Dopu à issa prima prova u giovanu autore hà da scrive regulare ind’è Kyrn sinu à u mese di nuvembre di l’81. Issi quattru anni, l’hà da passà Ghjuvan Luigi à scavà u fondu di l’usanze è cridenze ligate cù a magia, a religione è u sopranaturale in Fiumorbu. Ci hà da caccià tanti temi è mutivi à prò di un’ispirazione propiu persunale. I testi, longhi una pagina o duie segondu u postu cuncessu da u giurnale, portanu tituli significativi di a tunalità tematica « Speranza è amarezza », « U locu di i troncacolli », « Visioni », « L’ultimu viaghju », « Una frisgia di sangui verdicciu », « I surpadori », « I lagramanti ». O allora usanu un elementu chì pareria neutru o pusitivu, ma chì ùn stà tantu à lacà affaccà a disgrazia o a minaccia « I tralucenti », « Lumi, lumi », « A cetera », « I pinzuti è i sciaccati », « U Paradisu », « Dissegni », « A manu ».

Puru da e prime prove, quand’ella hè sullicitata a cultura lucale, ùn hè mai solu interessu etnugraficu, ma traspusizione di u memuratoghju di u locu in un ambiente mudernu cù persunagi, pensamenti è quistione oghjinche. Inghjuliati da a vita è da a disgrazia chì s’assumiglia à qualchì fatu tragicu, issi omi è isse donne d’oghje sò lampati in bocca à a vita cume s’ella fussi a più maiò di e cundanne. I rituali rammintati in isse finzione lascianu pensà ch’ella hè sempre stata cusì a sorte umana. Perchè chì si hè zittata issa primura di u scrive in giru à vintunu anni, ùn si sà. A scrivitura ammaestrata è sobria di Ghjuvan Luigi hè un peccatu ch’ella ùn avessi seguitatu a ricerca anticipata issi anni custì. Trà i prusatori cuntempuranei in lingua corsa pensu ch’ellu hè statu ellu à buscà a lingua chì ci vulia da fà in corsu una literatura di u presente, chì à tutti l’altri li si hè appiccicata troppu a primura di a lingua sputica. A so bella nuvella scritta à l’occasione di u cuncorsu « Misteri da impennà » di RCFM hè l’ultimu testu publicatu. Ma ci n’hè altri chì aspettanu. Speremu di vede ne affaccà frà pocu altri chì saranu stati scritti in u frattempu à a zitta è à a muta. Simu in brama di issa scrivitura neutra è forte, senza fisiche retoriche, chì si hè sappiuta francà da e trappule di u purisimu. Issa prosa dice sempre quant’elli sò desacralizati i valori umani, siasi universali cum’è corsi, è innalza a cultura guasi da sola certezza in una vita frolla chì ùn si pò dì.

_____________