A quistione di a lingua si sà chì in e situazione di diglussia spessu impedisce a riflessione è a discussione al dilà di l'affirmazione sempre listessa ch'ellu ci vole à salvà a lingua minurizata, è chì a lingua hè sacra... Spessu si sentenu è si cunsidereghjanu issi discorsi cum'è trappule è strette chì ùn sboccanu inlocu. È issa critica custindi ùn manca nè di ghjudiziu nè di verità chì invece di parlà di u tema prupostu (quì a literatura corsa) si parla di... a lingua in periculu! Di sicuru, issu mendu l'avemu ritrovu durante e nostre discussione, ma u sapè fà di Pasquale OTTAVI chì arregulava u barattu di i participanti è dinù a sputichezza di isse parolle attente à ùn incrispisce u dibattitu, è a sincerità palesa d'isse dichjarazione chì sò ancu state intruspezzione è cunfidenze cumuvente, tuttu hè statu utile chì tutti i participanti anu vulsutu esse in cunsunanza cù u so estru persunale è u tema d'issu scontru.