Versione :
Corsu

U RIACQUISTU (2)

In a messa à ghjornu precedente (31.08.2017) avemu insignatu l’idea è i principii chì vulianu dà puntellu è voce assicurata à a mossa detta di u “RIACQUISTU”. Trà issi puntelli chì cuntavanu di esse l'ampiificatore d’issa voce militante, RIGIRU ci avia un postu è una funzione prediletta. Cuntinuemu oghje cù a struttura di a rivista:

D.IMPALCATURA.

E.CULLABURATORI.

F.DUTTRINA.

Femu dinù u bilanciu) insignendu critiche è cuntrasti (G..BILANCIU).

 

D.IMPALCATURA.

Prima di u 1981:

Caparticulu

Literatura: creazione corse d’eri è oghje

A zarra: opera (di primura) scelta trà tante

Literature: traduzzione è/o studii di literature altre

Studii literarii: fatti literarii corsi

Cronaca culturale: filmi, dischi, è cet...

Lettare di lettori: à volte

Face prò ancu a risa: (da u n°10): titulu significativu di un tema di discorsu chì corre in u populu in quantu à u sforzu, u straziu militante

Dopu à lu 1981

Numeri tematichi (21: cantu, voce, silenziu), (22: locu,), (24: tempu è tempi), (25: lingua)

Di a struttura di nanzu, ferma soluu caparticulu. Affacca a vuluntà di un assestu novu (per indettu: “Un omu, una passione...)

Numeri monografichi è antulogichi: 18-19: A Rimigna. 20: G.Fusina.  23: Intantu. 26: Dì tù, o puè..

E.CULLABURATORI.

Si contanu 83 firme (è trà quesse 14 di femine) sinu à u n°17:

una quindecina sò assidue

da u n°8 (1977) si vedenu affaccà i primi scritti di una leva nova (sculari)

ghjente chì sò in generale insignanti, militanti culturali.Dopu à u 18-19 hè più difficiule à vede, chì u travagliu di redazzione in parechji hè più scarsu.

F.DUTTRINA.

Prugrama literariu precisu, strettu è purtatu cun minuzia ùn ci n’hè mai statu. Rigiru ùn hè statu l’applicazione di teurie literarie qualunque. Si presenta piuttostu da locu di scontru è di baratti, è di dibattitu spessu trà sensibilità literarie è parcorsi varii. È puru ci hè un accunsentu minimu chì face da filu di a rivista è ligna permanente

L’indiatura messa in testa da i primi numeri dice in corte parolle u scopu cercu è l’analisi accunsentite:

-Un’idea maestra: “esse in cunsunante cù u pinsamentu di l’antichi ma tene à mente chì oghje hè oghje”

-Una certezza: “U corsu pò dì tuttu: cunsequenza a rivista sarà sana sana in lingua corsa.

-Un scopu doppiu:

  • fà cunnosce a literatura scritta è à bocca
  • fà nasce opere novembre-una primura

-Una primura: sviluppà i studii nantu à a literatura corsa è quelle furestere

-Una tuleranza doppia:

  • micca regule ortugrafiche (fora di chj è ghj da trduce funemi specifichi
  • micca canalizazione di l’estru: “a rivista darà ciò ch’eddi ni farani i scrittori”.

G..BILANCIU

Accettata da tutti, issa primiccia si mudificò à misura ch’ella crescì a rivista. Necessità nove affacconu è nutrinu u dibattitu in a squatra di i redattori.

Certe parte piglionu a suprana è diventonu più strette altre rubriche. Cusì ùn fù tantu sbalancata “l’apertura à u fora" di u prugrama iniziale. U studiu di e literature altre ùn ebbe mai u vulume vulsutu è annunziatu in i primi numeri.In fatti u più di u spaziu edituriale fù quellu di a creazione: a robba venia è a rivista avia poche pagine. Si fece una scelta mezu cuscente, mezu ubligata da a brama di fà vede ch’ella era viva l’inghjennatura literaria.

In più ci vole à ricunnosce chì Rigiru vulia fà u passu più largu chè a so... infurcatura. A situazione publica di a Corsica mettia in prima ligna  u bisognu di dì u presente. A permanenza di a perdita culturale impunia l’affirmazione di l’identità culturale. L’ostaculu di e cuscenze dialettale rinchjuse ubligava ad insiste sempre di più in quantu à a a necessità di fà cresce a cuscenza linguistica di a Corsica unita. Dunque, a primura si impunia: Riacquistà è inghjennà, è isse duie necessità facianu passà in seconda pusizione a necessità di l’apertura à l’altru!

Rigiru vulia esse una vera rivista literaria ma a vita di a Corsica è a pressione di l’avvenimenti purtonu u dibattitu trà i redattori è più di una volta affaccò un certu tira è molla trà questi è quelli. Segnu chì Rigiru era un locu apertu nantu à a vita è ch’ellu pigliava u so significatu sanu sanu u prugrama chì l’avia fattu nasce.

H.DIBATTITU

1.L’attualità pulitica, a ripressione, a Corte di Securità di u Statu è a resistenza accuppiata cù a sulidarità fecenu sbuccà una quistione fundamentale:

“Trà mezu à e quisttione pulitiche, chì filu avia da esse quellu di Rigiru?” (D.A.G.lett.à G.T, X.1981)

À u principiu si era decisu di ùn fà micca pulitica chì si sapia un affare: avia un altu significatu puliticu un fattu micca puliticu, ma culturale: scrive un giurnale sanu sanu in corsu è scrive à modu è cù i temi oghjinchi (...) Oghje pare una cosa naturale naturale. Tandu, dice Geronimi, paria basi cà una scimitai è fà una sfida...”  (D.A.G.lett.à G.T, X.1981)

Diceremu ch’ella fù un’opera di cuncepitura è d’estru naziunale. Ùn ci hè altra manera di insignà nè di chjamà issu slanciu di una literatura maiò, libera di qualsiasi dipendenza è primurosa di spechjà si è di spechjà u mondu sanu cù i so mezi sputichi soi.

U fattu si stà chì l’apparente neutralità di Rigiru scumudava à certi, drentu è fora durante issu periudu di resistenza/ripressione. È si vede cumu a quistione si punia:

“Hè più indiatu quellu chì dice ch’ellu hè o quellu chì face da indiatu ancu par ùn vulè dì è tante volte ancu par ùn vulè esse?...” (D.A.G.lett.à G.T, X.1981)

In tutte e manere  issu dibattitu firmò apertu è senza risposta di a squatra.

2.Un’accusa. O un rimprovaru fattu à a rivista hè di esse si spiccata da u populu, di praticà una lingua ricerca, preziosa è arcaizante, di temi, di primure è di capatoghji intelettuali tropu. Lussu di scrittori dati si à i dulciumi di e fisiche di l’arte, nutriti da un pensamentu è da riferenze mentale furestere: eccu, à l’ingrossu, a figura ch’elli facianu quelli di Rigiru.

Un cuntrastu digià vechju in issa nova literatura: u truvemu spressu digià , di veranu 1976, in certe prese di pusizione di currispundenti di R.Coti in a Lettera misinca, sparta è mandata da marzu à lugliu d’issu annu: ci si trova cusì l'argumenti cuntrarii trà partisgiani  di un’indiatura chì metti a literatura à serviziu di u militantisimu puliticu, ancu pruchjamendu  l’arretta di a voce propiu literaria, è po l’altri, i fidati di un’idea chì face a literatura indipendente di qualsiasi utilitarisimu. Puru quand’ellu hè degnu quessu, chì hè di una causa ghjusta. Un’attitudine chì crede ch’ellu sia pussibule, per sopra à l’ideulugia è l’isturicità, di stabilisce un dialogu trà e literature.

Siasi chì siasi, s’infatta chì u caparticulu di Rigiru 8 (marzu 1977) ricusa issi rimprovari:

  • purtendu una definizione alta di l’intelettuale corsu “in cerca di l’altri è di sè”, duv’ellu s’annasa qualchì fume di Cispra.
  • Critichendu l’illugisimu è a debulezza di u ragiunamentu: “in un modu si brama è si dice chì a lingua è a literatura corsa sprimenu una cultura sputica chì esiste è in quill’altru modu si ricusa ch’elle possanu esse prupense à fà riflette ancu à l’alture è ch’ellu ci voglia ancu u stantu. Ind’un modu si dice... è in quill’altru modu si tira omu in coda...”
  • Accertendu a necessità pè u populu corsu di u stantu è di u sforzu da accresce è assicurà in l’oghje l’acquisti di i maiò è di a tradizione
  • Mettendu in lume l’uriginalità di a “situazione” di a rivista: “Hè capita chì s’ellu si trattassi solu di a rivista ci stavamu zitti, ma Rigiru ùn conta; cuntà conta u rigiru di un populu, vene à dì a riflessione è u fà di a ghjente”.

3.Un cuntrastu micca chjosu?

U studiu sinteticu ferma da fà è e cunclusione da stabilisce cù un’analisi sociocritica.

  •  A quistione di l’indiatura di una literatura hè troppu generale è cunvenziunale da arricà qualcosa. Basta à fighjà è valutà cum’ella sequita è cumpletta l’intertestu di una sucetà (pruspettiva di ricerca). S’omu feghja a literatura conta più u testu di l’opera chè u discorsu nantu à l’opera.
  • Da un altru puntu di vista, si pò rimarcà chì dibattiti simuli palesanu i dati strutturali è e tappe di l’affirmazione identitarie, dopu à e rivendicazione (discorsu prugramaticu>prova di applicà lu>affirmazione vera). E varie sensibilità di i culturali anu modu à circà à definisce trà dialoghi è cunflitti, i modi di andà è e pruspettive... chì in i fatti si vede duv’ella corre a dinamica: a cultura corsa à pocu à pocu si hè staccata da u discorsu rivendicativu per pruvà à piglià un’andatura più literaria.

 

In issu muvimentu di l’anni 1970-1980, Rigiru hè tesimunianza di una vulintà originale per via chì a so urientazione pare à bastanza isulata in issu ambiente storicu.

In termini sociologichi ci saranu parechje ipotesi: furmazione, statutu, lucalizazione persunale è raportu à a Corsica di i redattori per indettu.

In termini più larghi è generali, simbolichi, psiculogichi, suciali,, in termini di discorsu nantu à l’identità, l’affari sò diferenti perchè chì pare evidente oghje chì issa iniziativa vulia mudificà (inghjennà?) l’imaginariu culettivu ligatu cù a forma è u sensu di a cuscenza di a lingua è di l’identità.

Si tratta in fatti di una prova storica da pudè passà da a cuscenza dialettale à a cuscenza linguistica. Quessa hè una vera revuluzione, compia per certi gruppi, ma ancu da rifinisce per l’inseme di a cumunità.