U ricordu de la cità antica di Mariana ne ùn si hè spentu longu à i seculi è e so vistiche parechje volte sò state ammintate da l’età di mezu nova.

E prime scuperte sò di a fine di u XVIII^u seculu è riguardanu l’archeulugia navale. Di fatti, u 17 d’aprile 1777 lors quand’elli scavavanu da fà u canale di assiccame chì ligava u Golu cù u u stagnu di  Biguglia i geometri di u Plan Terrier anu messu à palesu e vistiche d’un restu di nave prerumana (VI^u seculu prima di G.C.) in statu di cunservazione perfetta.

Cuscenti di u putenziale storicu, i Corsi da u XIX^u seculu anu messu à fà qualchì scavu archeulogicu. Hè cusì chì u museu di Bastia pussede unepochi vasi ma e prime ricerche archeulogiche vere sò state fatte solu trà e duie huerre. Da tandu parechje campagne di scavi si sò fatte in Mariana.

In u 1936 è u 1937,  Luigi Leschi, direttore des Antichità di l’Algeria, è Albertu Chauvel, caparchitettu di i Uonumenti Storichi,  mettenu à fighjulà è marcà u situ cù i so cuntorni. Mettenu à scandaglià in parechji punti in modu à porghje un’idea di l’urientazione è u statu di cunservazione di l’edifizii. Sò i primi à stabilì un resucontu di e so  ricerche cun l’analisi precise in quantu à Mariana.

À a fine di l’anni 50, e campagne de scavi ripiglianu sottu à a direzzione di Geneviève Moracchini-Mazel. Si svolgenu da u 1958 à u 1990 è ùn si pò nigà ch’elle sianu oghje e più ricche è chì ci amparanu di più. Permettennu di scagià a basilica è u nattisteru paleocristiani di Mariana cun dinù u santuariu di San Parteu. Quessu custindi si trova fora di l’accintu di a cità rumana in una zona cimiterriale ligata cù e necropoli di u Palazzettu è di Murutondu duv’elli sò stati fatti dinù scavi precisi assai. I travagli di Geneviève Moracchini-Mazel si sò dinù primurati di l’abitatu anticu postu vicinu à a basilica è dinù à un’altra necropoli visticata in perfiferia este di Mariana in u locu dettu I Ponti.

A campagne dopu l’hà purtata Patriziu Alessandri durante l’annu 1994 quand’ellu si fece u scavu di una trancea di 800 metri in lungura da San Parteu sinu à a catedrale di A Canonica è chì devia riceve un canale di risanamentu. I risultati d’issi scavi cunfermanu chì a zona cimiteriale di San Parteu era ligata cù e necropoli di Palazzettu-Murutondu. Ma vistu quant’ella hè stretta a zona scavata, e vistiche scuperte sò solu qualchì sepultura è inseme custruitu cun mubligia ceramica, metalli, vetrame è unepoche munete.

In u quatru di travagli di ristauru è valurizazione di u situ anticu, à listessa epica hè fatta una campagna di  rillevati. Si hè fatta issa operazione cun scopu dinù d’infurmà i circatori chì vulianu mette in postu i scavi futuri. Hè stata cum’è un preambulu prima di rpiglià u studiu di Mariana. 

In u 1998, Filippu Pergola cun cullaburazione di Daniele Istria dirige una pruspezzione-inventariu nantu à e cumune di Lucciana è di U Borgu. Issa andatura và cun un prugettu di studiu di a culunia rumana. I risultati d’issi travagli facenu prevede l’esistenza di un’ accinta di necropoli intornu à a cità cun dinù abitati cuncentrati in a zona di piemonte à l’ueste di a cità.

In u 1999 è u 2000, Filippu Pergola mette à scandaglià in parechji punti nantu à Mariana stessu è i cuntorni di a cità prima di principià di settembre 2001 un scavu prugramatu in a parte sud di i vechji scavi di G. Moracchini-Mazel. Tutti l’anni si riface issa operazione durante i mesi di settembre è ottobre in u quatru di un Prugettu Cullettivu di Ricerca intitulatu « Mariana et la basse vallée du Golo de l’Age du Fer à la fin du Moyen Age ».

À l’ultimu, di Ferraghju di u 2004, u Labiana assuciatu cù u Cerpam de Mariana è l’associu Curtis fecenu pruspezzione geofisiche nantu à u situ anticu è medievale di Mariana. Issa intervenzione si hè fissa nantu à un locu privatu situatu à pocu pressu à 300 metri à nordu di a catedrale di a Canonica. Si vulia cuntrullà cusì e prime scuperte (1936-1937) è precisà ciò ch’è no sapemu pè u più in quantu à i munumenti publichi, u postu di u forum sempre scunnisciutu. Cusì issa radiografia di u sottuterra, chì ampara assai, hà permessu di stimà a forza di u putenziale archeulogicu interratu. Avale tocca à l’archeulogu d’interpretà e maghjine scavendu à i punti strategichi.