G.THIERS

Era Bastia sana sana: adunita in i so panni di dolu, pedighjava à torchje accese per strette è per carrughji. Cum'è sempre. A cità si inturchjava ind'è l'andati sempre listessi. Terranova bughja è massiccia. L'Olmu à l'orlu di A Marina duve rughja u marosu. San Ghjuvanni infurcatu ind'è un tufone d'ombra. E Terrazze sucidose è e centu arrette sott'à e nichje alluminate. Compiu u giru grande, à l'ultimu tutti vultavanu à Santu Agnaziu. L'illustrissimu primu magistratu di a cità marchjava in testa. Implurante è superbu, cù dui servi à fiancu chì purtavanu una lancia calata. Daretu, un prete scalzu, à funa à u collu, è chì purghjia sopr'à i capi un cristu neru è magrantinu. Dopu à un stolu di pretini, i battuti incurunati à spine, carchi à catene o à croce larghe quant'è burdinali. Si minavanu di staffile unu cù l'altru è facianu sanguiniccia nant'à a tighjata ghjalata è turchina di u carrughju. A fanteria è a cavalleria seguitavanu, muti è à spada calata, in un son'lagnosu di tamburi è di pifferi. A' mezu à a prucessiò, un frate cappuccinu scalzu purtava una croce piena à lumi indentru. A passione di Ghjesucristu. Daretu ci era tuttu u cleru è u capitulu sanu sanu di a catedrale. Cantavanu à voce lagnosa è tetra u Miserere in giru à u catalettu chì ciambuttava, sott'à un baldacchinu umbrosu, u cadaveru di u Signore. A' l'ultimu ci era A Vergine dulurosa, inturniata di l'allevi di i frati chì cantavanu u Stabat Mater è strascinavanu i gunfaloni neri chì e punte venianu à schjaffittà ci a faccia.